Hat-trick nena Barca chakpuitu Torres
First half-a Ferran Torres-a hat-trick siam zanah Barcelona chuan 5-3-in mualneitu Real Betis an hneh a, Spanish La Liga table-a an hmahruaina an sawhnghet a, point li laiin anmahni hnaihbertu Real Madrid kalsan mah se nizan Bernabeu result tarlan hman loha Celta Vigo an tlawm chuan league kal laia a sang pahnih inthlauhna hi point khatah bawk a chhuk thla leh ang.
Catalan team khan Real laka point khat chauha chungnung der der chungin mipui 64,562 punkhawmna Estadio La Cartuja de Sevilla an lut a, goal an chhuah hmasa!
|an atanga minute rukna lekah Manchester United winger Antony chuan season kal laia a goal rukna thunin mualneitu team-in hma an hruai hma hle.
Betis hmahruaina hian a daih rei lo a, minute 11 an khelh tlin rualin Torres chuan mawi zetin Barca siphurh sutna goal a thun a; a hnu lawk, tuibur hmuam da awm vel lekah Manchester City forward hlui Ferran Torres bawk hian a goal hnihna khung zui lehin, Nou Camp club hian 2-1-in hma an hruailet.
Darkar chanve an khelh pel hlek tihah Torres-a goal hnihna chhawpsaktu kum 20 mi lek Sweden winger Roony Bardghji chuan a La Liga goal hmasaber hmangin mikhual team hmahruaina a belhchhah ve leh.
Heti chinah hian Hansi Flick-a team an la duhtawk mai lo a, chawlhlawk hma minute nga la awmah Torres bawkin he match-a a goal thumna leh 4-1-a mikhual team hmahruaina goal khung zui lehin, he goal hi Pedri siamsak a ni ve thung.
Tun kha a career-a Torres-a hat-trick siam vawi thumna niin, January 2024 pawh khan Real Betis lakah tho hian goal thum a lo thun tawh a ni.
Barcelona hi second half-ah pawh a nawrtu zawk an la ni zui ta zel a, darkar khat an khelh tlin hma chiahin Catalan-ho hian inhnial theih takin penalty an hlawhchhuak a, video assistant referee (VAR) endiknaah Marc Bartra khan a kutin bal a dang nia ngaih a ni a; Lamine Yamal chuan cool zeta penalty chhuihin season kal laia a goal rukna a thawh ve leh.
Hun pangngai tawp hma minute nga chiah awm tawhah Diego Llorente chuan home team goal hnihna khungin, minute 90-ah Jules Kounde chuan box chhunga Abde Ezzalzouli a tihtluk avangin penalty a chawi a, Cucho Hernandez chuan Betis goal thumna khung er zawk mah se si hniha an la hnufualna sut zo turin mualneitu team hun neihin a daih tawh lo!
Inkhelh bana ngaihven hlawh zui ta ber chu Barcelona forward Roony Bardghji kha niin, tun kha La Liga lama bul a tan vawi thumna chauh la ni mah se a laka boss Flick-a’n rinna a nghah chhan tipuitlingin a league goal hmasaber a khung ve ta hial a ni.
Roony kha Kuwait rama piang niin, kum ruk mi lek a nih laia an pemluhna ram Sweden tan match thum a khelh tling ve tawh.
Talent nei tha zet Roony khan rawlthar kum 16 mi lek a nih laiin a competitive debut chu Copenhagen thuam inbel chungin a nghak chhuak a; kha mi tum khan an club tana khel thei naupangber niin, chu mi atanga ni ruk hnu lekah Copenhagen tana a goal hmasaber a hlawhchhuak zui ta nghe nghe.
Kum 2023 khan Roony hian 4-3-a Manchester United an hneh tumin Copenhagen tan goal khat a thawh a, kha pawh kha a Champions League goal hmasaber a ni.
Chuti taka rawlthar kawlhrawng leh khelmual chhunga phut zuk nei lo ta chu Barcelona-in an ngaihven thuai a, kumin July thla khan an insenglut fel a; Catalan club-a kum li daih tur contract a ziah atanga thla thumna lekah Sweden tana a debut pawh a nghak chhuak zui ta mai a ni.