Mizoram politics tichhetute chu sum leh pai hausakna hmachhuana politics khel thintute an ni tih Congress thupuangtu Dr Lallianchhunga chuan a sawi.
All India Congress Committee member ni bawk Dr Lallianchhunga hian Champhai South bial a fannaah sum leh pai hausakna hmachhuana politics khel thintute hian mipui hi bungraw lei theih ang chauhin min hmu a, an sum leh pai hmanga lei mai theihah min ngai thin a. Mipui kohkhawm nan an sum leh pai hmangin tawktarh an siam fo thin, tiin a sawi.
Sum thiltihtheihna hi hmeh mih thuai loh chuan politics chu mi hausate chauh buaipui phakah kan chhuah mai ang tih a hlauhawm tih sawiin, “Kan thenawm state-ah te chuan cheng nuai 200/300 neih loh chuan inthlana din ve a ngamawm tawh loh. Mizoramah pawh sum nei ngahte chauh din ngamna bik ‘bial sakei’ a awm der tawh,” a ti.
Politician mihausate sum thiltihtheihna hnuaia kan intukluh lohna turin beih tang tang a ngai tih a sawi a. An thuhnuaia awm hun a thlen chuan kan khawtlanga mi tha tak takten politics an buaipui duh loh hun a thleng anga, an kuta kan ram a awm chuan a tuartu tur chu miretheite kan ni dawn, tiin, “Politician mihausate hian an hausak belh zelna tur bak an ngaihtuah tak tak ngai lo,” a ti.
Lalna leh thuneihna chu Pathian atanga chhuak a nih angin, chumi thuneihna hmang chuan dik tak leh fel takin Pathian duhzawnga mipui rawngbawl sak mai chu politician-te tih tur a ni tih MPCC thupuangtu hian a sawi a. Minister emaw MLA emaw nih hnua mahni inthup nana midang hminga contract leh supply thawhte chu thuneihna hmansualna, political corruption diktak a ni, tiin, “Heng laka fihlim politician-te hi kan ram mamawh chhanna an ni,” a ti.
Hausakna hmachhuana khelte hian Zoram politics an tichhia – MPCC thupuangtu
