Daily Newspaper

Haw hun bituk leh mahni thua inkhung hrantir sorkarin remti lo

7

Krismas a hnai a, Mizo society-ah chuan mahni khuaa haw hun a intan mek; mahni khuaa Krismas hmang tura haw hunah hian hrileng vangin mi tam takin harsatna an tawk thei a, haw hun tur bituk leh inkhung hrantir tum te an awm. Hei hi sorkarin a remti lo a, heti zawnga hma la lo turin khaw hrang hrang an ngen, home department hotute’n an ti.

“Khaw hrang hrangin an khuaa haw turte haw theih hun chhung an siam tih te kan hria a, hei hi sorkarin a pawmpui lo a, a hriatpui lo a, heti zawnga hmalak hi a remti lo,” tiin home secretary Lalbiaksangi chuan The Aizawl Post a hrilh.

Hemi chungchang hi an hriat veleh home department-in district bawrhsap tinte an hriattir a, khap turin an hrilh nghal tih a sawi a, bawrhsap tam zawk chuan thu pawh an chhuah tawh nia an hriat thu a sawi bawk.

Home secretary Biaksangi chuan district dang atanga district danga kal khapna emaw, khaw dang atanga khaw danga kal khapna emaw, chutiang a awm loh thu a sawi a, Covid-19 do tirh lamah district leh district intlawh tawn theih a nih loh thu te, mikhual neih loh tur tih a nih thute sawiin, tunah chuan chu pawh chu a awm tawh lo tih a sawi.

Inkhung hran chungchangah pawh mahni duh dana kal lo tur leh sorkar thu zawm turin mipui an ngen tih a sawi a, tunah chuan inkhung hran (quarantine) hi Mizoram pawn atanga Mizorama rawn lutte chauh a huam thu leh Mizoram chhunga awm sate a huam loh thu a sawi.

Mahni khuaa lut turte Covid-19 hri an kai lo tih finfiahna nei tura inphut tur a nih loh thu pawh a sawi a, “Negative-te chauh kan khuaa luh tur tih hi, hetianga tih tur a ni lo a. Dan a awm a, chu chu zawm ila, kan zavaia tan a tha,” a ti.

Krismas hmanga tura an khuaa haw turte tana hun bituk khua hi an awm nual nia hriat a ni a, December ni 12 hnu lama haw remti lo te pawh an awm tih thu dawn a ni. December ni 15 hmaa haw tura hriattir te pawh an awm a, Covid-19 free certificate phut te pawh an awm tih thu dawn a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy