Mizoram Universal Health Care Scheme leh AB PMJAY a inziaklut mi 1154808 atangin medical bill thehlut zaa 7 an ni a, chawhrualin damlo pakhat bill hi Rs. 15106 a ni.Mizoram Universal Health Care Scheme (MUHCS) thuneitu sang Governing Body chu an chairman, chief minister Lalduhoma hoin Thawhtanni khan an thukhawm a. Heta report danin, sawrkar kum kal mekah MUHCS atana fund hmuh tawh zawng zawng cheng vaibelchhe 154 vel a ni a, la hmuh tur vbch. 48 vel a awm. Damlo bill endik tawh 83682 niin bill pek chhuah tawh vbch. 126 vel a ni a; bill endik tur vbch. 38 vel a la awm a, endik thuai tum a ni.
MUHCS-ah hian chhungkaw 20198 mihring 80792, pensioner chhungkaw 10236 mihring 40944, sawrkar hnathawk chhungkaw 35325 mihring 141300 leh AB PMJAY chhungkaw 222943 mihring 891772 awmna, a vaiin chhungkaw 288702, a mihringin 1154808 an inziaklut mek.
Sawrkar kum kal mekah MUHCS leh AB PMJAY a chhungkaw inziaklut zawng zawng atanga chhuta zaa 29-in medical bill an thehlut a, chu chu mihring inziaklut zat atanga chhutin zaa 7 an ni. Mi pakhat hnena bill pek zat (approved) hi chawhrualin (average payout per patient) Rs. 15106 a ni.
Thutkhawma sawi danin, MUHCS kalpui hnuah sawrkar damdawi in pantu an pung nasa a. Bill endik tawh zaa 70 chu sawrkar hospital-a lut an ni. Sawrkar hospital-a lut hi tam zawk mah se, an bill erawh bill pawm tawh zawng zawng atanga zaa 39 a ni. Private hospital pantute bill a san bik chhan chu, natna serious bik – thluak zai, thin thlak leh kal thlak ang chi an nih thin vang a ni tlangpui. Hei vang hian sawrkar hospital thuam chak zel a tul hlea ngaih a ni.
Sawrkar hospital leh empanelled hospital-a enkawl theih natna chu a theih chin chinah non empanelled private hospital-a refer loh nise, an ti a. Non empanelled hospital-a enkawl tura refer theihna dan, nunna atana hlauhthawn awmah pawh natna kalpui theih chin chiang lehzuala sawifiah tum a ni.
‘Sawrkarin empanelled hospital hnenah ni 30 chhungin bill a pe chhuak thin ang,’ tia dan siam a nih laiin, sum dinhmun a that avangin kartin sum an pe chhuak thin zawk tih sawi a ni a. Empanelled hospital-te tan harsatna engmah a awm rih loa ngaih a ni.
MUHCS chu sawrkar kum mila kalpui a ni a, sawrkar kum thar atanga chak zawka kalpui a nih theihnan tun thutkhawmah hian ruahmanna siam a ni a. Committee tihtlem tha an tih angin Core Committee tihbo a ni ang. Kalphung dang pawh siamrem hlek hlek a awm a. Chu’ng zingah chuan damdawi man tlawm taka lei theihna tur – pharma depot din tuma hma lak leh subscription-a double beneficiary awm palh thei laka invenna siam, tih a tel a ni.
Health care-a inziaklut atangin zaa 7-in medical bill an thehlut
