Healthcare scheme hnuaia damdawi in inenkawlna senso bill tu mi 11046 dawn tur sum cheng, vaibelchhe 39.26 chu Zirtawpni khan sawrkarin a tifel.
Health secretary Esther Lalruatkimi hminga department thuchhuakah hei hi sawi niin, cheque hi Zirtawpnia tihfel hman ni mah se, vawiin – March 9 hi bank chawlh a nih avangin karleh Thawhtanni (March 11) ah bill dawng turte account-ah Mizoram Rural Bank atangin pekchhuah tan beisei a ni a, MRB lam pawh chak taka beneficiary te account-a lo thun tura ngen an ni tih a sawi.
Heti hian tuna healthcare bill la pek hmabak chu kumin February leh March bill chauh a ni tawh dawn a. Hei pawh hi sawrkar ruahmanna zarah bawhzui chhoh zel theih a ni tawh dawn a, health care bill ba nei loin sawrkar a kal chho ve dawn hnai tih a sawi a ni.
Nikum December 11-a sawrkar thuchhuah hmanga mipui hriattir a nih tawh angin, chief minister Pu Lalduhoma hoa Finance department hotute thukhawm chuan healthcare bill ba pek atan cheng vaibelchhe 40 a dah hrang a, tunah cheque peihfel a ni ta a ni.
Zirtawpnia Assembly Session-ah chief minister Lalduhoma chuan, healthcare-a an intiam angin kumin February 19 khan pawisa an pechhuak a, bill tang damlo 13053 awm mek tan tunah cheng vaibelchhe 45.59 an pechhuak dawn a, hei hian daih turah an ngai tih a sawi. “Bill tang mek kan clear zawhah vbch. 4.40 hman bang kan la nei dawn a, damlo tharte bill pek atan kan hmang tawh ang,” a ti.
Health care bill tang vbch. 39.26 tichhuak
