Site icon The Aizawl Post

Health Care Scheme-ah cheng vaibelchhe 29 ba

Kum kal lai 2022-23 chhung hian Mizoram State Health Care Scheme hnuaiah bill tang cheng vaibelchhe 29 a awm thu Budget Session liam taah khan House-ah sawi a ni.
Aizawl North II bialtu Dr Vanlalthlana zawhna, ziaka chhan chi chhangin finance changtu, chief minister Zoramthanga’n 2022-23-ah mi 9,812 te bill Rs 29,66,04,960 a tang tih House a hrilh.
A chhannaa a lan danin, 2020 October ni 1 atanga 2021 September ni 30 thleng khan mi 899-te bill Rs 2,71,24,969 a tang a, 2021 October ni 1 atanga 2022 March ni 31 thlengin mi 12,761 bill Rs 33,53,55,053 a tang.
Dr Vanlalthlana’n Mizoram State Health Care Scheme tihchangtlun tum dan a zawhna chhangin chief minister chuan Asian Development Bank (ADB) atangin cheng vaibelchhe 1,008 puk tum a nih thu a sawi.
“Tuna Mizoram State Health Care Scheme kalpui danah hian natna zawng zawng bill theih tawh a nih avangin bill lut a tam a, pekchhuah pawh a tam a, hei hi tuna Corpus pung hian a daih lo a ni,” chief minister chuan a ti.
“Hei vang hian Corpus sum bawmah pawisa thahnem tham tak mamawh a ni a, hemi tur pawhin Asian Development Bank (ADB)-ah Rs 1,008 crore puk tur dil mek a ni. Hei hi hmuh theih thuai beisei a ni a, sorkar atanga a hrana sum pek belh ngai tawh lovin ADB atanga sum puk tur pung atang hian Mizoram State Health Care Scheme pawh changtlung zawka kalpui theih beisei a ni,” a ti bawk.

Exit mobile version