Health minister-in Mizoramah AIIMS din ve turin centre ngen

Health minister-in Mizoramah
AIIMS din ve turin centre ngen
Health & Family Welfare minister Lalrinpuii chuan Thawhlehni khan New Delhi-ah Union Health minister JP Nadda a kawm. Mizoram Health minister hian ziak leh chhiar thiam tamna ber state leh state ralmuang ber kan ni chungin, kan state-in sawrkar laipui zirna in lian – IIT, IIM kan nei ve lo a. India ram state hrang hranga doctor zirna in tha leh damdawi in lian awmna AIIMS tal chu Mizorama din ve ngei turin a ngen tih a sawi.
Sawrkar laipui hian kum 2006 atang khan India ram hmun 22-ah AIIMS (All India Institute of Medical Sciences) thar din turin hma a la tawh a, tunah hian AIIMS 22 hi an function hlawhtling deuh vek tawh tih sawi a ni. AIIMS thar dinna scheme – Pradhan Mantri Swasthya Suraksha Yojana chu tuaithar a, Mizorama din ve ngei turin a ngen a ni.
Union Health minister chuan Mizorama AIIMS hawn a nih theihnan hma a lo lak tur thu a hrilh a. Larsap Gen. Vijay Kumar Singh nen inthiantha tak an ni a, a theih dan dana hmasawnna kawnga thawhho a duh tih a lo sawi a ni.
Thawhlehni vek khan Women & Child Development minister Lalrinpuii hian Union minister for W&CD Annpurna Devi a hmu a. An department-a hmalakna tur an sawi dun bakah women helpline sum pekchhuah tlai chungchang chu lo enzui a tum thu a lo hrilh.
Union Rural Development minister a zinbo lai a nih avangin RD secretary Shailendra Kumar Singh a hmu a. Mizoramah kum upa, tar pension dawng thei, dawng si lo an tam thu hrilhin, Mizoram allotment tipung turin a ngen. Sawrkar laipuiin mi pakhat tana tar pension, hmeithai pension leh vohbik pension a pekna rate a beitham em avangin tihpun dan kawng zawnpui turin a ngen bawk.
RD secretary hian tar pension allotment tihpun leh a rate tihsan chu Union cabinet pawmpui ngai thil a nih avangin an lo bawhzui tur thu a hrilh a ni.