Daily Newspaper

Health minister-in ramria duty-te a tlawh

6

Health & Family Welfare minister Dr R. Lalthangliana chuan Thawhlehni khan District Hospital Kolasib sakthat dan tur a hmunah enin Kolasib District Level Task Force thutkhawm a telpui a. Vairengte tlawh nghalin Health department hnuaia thawktute leh khawtlang hruaitute nen an inkawm.

Health minister chuan Kolasib district chu Mizoram hmel lanna district pawimawh tak a nih angin, an district chhunga sawrkara mawhphurna chelhtute leh tlawmngai pawl hrang hrangte an pawimawh tih a sawi a. Hrileng dona kawnga an thawhhlawk zia sawiin, an inpekna hrang hrangah lawmthu a sawi. Kolasib District DCHC chu changtlung zawka thawmthat tum a nih thu leh District Hospital tan oxygen plant – NESIDS atangin 80 LPM, PM Cares atangin 250 LPM siam theihna khawl bun tum a nih thu a sawi a ni.

District Hospital Kolasib hi khum 100 lenna tura thawmthat nan North East Special Infrastructure Development Scheme atangin cheng vaibelchhe 22 ruahman a ni a, hna tan tur hian hma lak thuai tum a ni.

Vairengtea khawtlang hruaitute a kawmnaah Covid-19 hri dona kawnga an harsatnate a ngaihthlak sak a. A tul apianga hman atan cheng singkhat a hlan. HOPE Centre, Vairengtea Covid-19 hrikaite enkawl nan cheng 5000 a pe bawk. Ramria duty Mizoram Police-te hriselna endik turin Medical Operation Team chu vawiin (August 4) hian an kalchhuah tur thu sawiin, “Ramri hrula duty Mizoram Police-te leh khawtlang hruaitu, duty-te tawiawma che chhuak zingah hri kai inringhlel an awm a nih chuan a thlawna endik sak an ni ang,” a ti.

Health minister hian Thawhlehni vek khan Kanhmun khuaa Covid-19 Screening Point leh ramria duty sipaite a tlawh a. Kanhmun khua chu ramria awm, thenawm state-te nen inkalpawh reng an nih avangin Covid hrileng lakah fimkhur a tul hle, tiin, thenawm state atanga rawn lut ten Covid an kai leh kai loh endikna hmun, screening point-a thawktute chu taimak chhuah zel turin a chah.

Kanhmun Screening Point hi nikum July atang khan mumal taka kalpui a ni a. Mi 14450 screening nei tawhin, Rapid Antigen Test hmangin 12122 endik an ni tawh a, hri kai hmuhchhuah 91 an awm tawh a ni. Tunhnaiah bungraw phur driver leh handyman-te chu screening bak a ngaih tawh loh avangin sample endik loha kaltlang tir an ni. Screening point hi Assam atanga luhna lamah siam a nih avangin Tripura atanga Mizoram luhna, Langkaih leiah police duty point siamin, lirthei rawn lutte uluk taka chhinchhiahin screening leh test kalpui a ni bawk.

Kanhmun Screening Point-a Covid-19 kai hmuhte hi Mamit district-a hri kai enkawlna hmun hrang hrangah dah an ni a. Kanhmun-a hri kaite enkawlna hmun 4C ah tunah hian 51 enkawl mek an ni. Minister hian Kanhmun Screening Point-a duty-te tan cheng singkhat, hand sanitizer leh surgical gloves thahnem tak a pe a. Kanhmun mipuiten ambulance an mamawh thu an lo thlen chu ngaihtuah tum a nih thu a sawi.

Minister hian Assam leh Mizoram inrina – Medili lei tlawhin tunhnaia Assam nena boruak duhawmlo thleng chu pawi a tih thu a sawi a. Ramria duty Mizoram police-te chu ram leh hnam chhan nana hma an lakna leh an thawhrimna fakawm a tih thu sawiin, anmahni tlawh hrim hrim chu tula a hriat avanga tlawh a nih thu a sawi. Medili lei lehlama Assam lamin kawng an danpin chu tha a tih loh thu sawiin, national highway danchah hrim hrim chu dan phal loh a ni tih a sawi. Kanhmun khawtlang chu Tripura nen boruak tha neih chu chhawmnung zel a, inkawm ngeih deuh deuh turin a chah a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy