Heat in final an lut
Thawhleh zing khan NBA Eastern Conference play-off final khelh zawh a ni a, inkhel pawimawh takah Miami Heat chuan point 103-84-a hnehna changin final an lut. Heat hian NBA Finals-ah Western Conference champion Denver Nuggets an hmachhawn zui leh ang.
Miami Heat hian Eastern Conference final-ah bul an tan tha viau a, game thum an chak zawn nghal. Series-ah 3-0 a hma an hruai hnuin game thum an tlawm zawn ve leh thung a, final game sarih ngawt khelh a ngaih phah. Final game sarihnaah hian game hnuhnung pathuma chak zawn Celtics in chak nawn leh tum viau mah se an tum an tihlawhtling zo lova, NBA record thar siam an tumna an puitlin zo lo.
Final game 7-naah hian Miami Heat an khel tha viau a, quarter thumnaah point khatin an hnufual ve zeuh tih loh chu quarter dangah chungnung zawk an ni vek a. Point 19 zeta hnehna changin Eastern Conference champion a ni ta a ni.
NBA final hi ningani zing atangin khelh tan a ni dawn a, Western Conference champion Denver Nuggets leh Eastern Conference champion Miami Heat ten champion nih an inchuh ang.
Heat in final an lut
