Daily Newspaper

HEI LO LIAMA SOCIAL CRIME?

13

-Mahmuaka Chhakchhuak

Mizoram State Election Commission chuan August 27th, 2020 niin Local Council 59 leh Village Council 551-ah te Inthlan a buatsaih ta a. Vawiin thlengin a result kan la hre chho ta zel hi a thinrim thlak ngawt mai. State Disaster Management Committee ngeiin ‘loh theih loh a nih loh chuan mipui pawn chhuah loh tur a ni’ tiin thupek a chhuah mek a. Kohhran Biak In ngei pawh khar char char la niin Inkhawm theih loh reng a la ni a. Dik tak chuan kum upa zawk tan te phei chuan Pathiannia Inkhawm loa awm hi hrehawm tak a sin. Ka hmelhriat kum upa ang reng tawh tak pakhat phei chu Pathianni zing apiang hian khel loin Inkhawm turin ala insiam ziah a, chhungte tan pawh khap har tak hian Biak In lam a pan leh mai thin. Pathiannia Inkhawm theih loh chu a hrethiam thei der lo mai a, rambuai laia sipai hlauh vanga inkhawm loh ang pawh a ni chiah lo deuh bawk nen a khawngaihthlakawm thin viau a ni. Heng bakah hian chhiatni thatniah zawng zawngte pawh kalphung tihdanglam vek a ni bawk a, chhungkhat laina leh thian hnaite ngei ngei pawh lungawih lo chungin hun kan hman liam pui a ngai fo ta a nih hi.

Hetianga boruak rit takin min chimbuai reng laiin kan sorkar lam atangin Local Council leh Village Council-ah Inthlan a buatsaih ta tho a, Opposition lam atanga ngenna te chu hnawl zelin Inthlan dawn zan thlenga an thu thlen te ngei pawh chu ngaih pawimawh sak an ni ta chuang lo a nih kha. State Election Commission chuan Central YMA hruaitute leh MPF hruaitute chu Aug. 20, 2020 ni khan a kokhawm nghe nghe a nih kha. Social Distancing pawimawh zia te sawi thar lehin Aug. 27 ni chuan Inthlan ngei tur a nih thu te chu uar taka puan zel a ni a, thenkhatte chuan community transmission avanga hri kai thar an awm ngei an ring bawk a, chhungkaw thenkhat lahin an ina campaign an lo remti lo bawk a, Candidate tan ngei pawha campaign huphurhawm khawpin kan boruakin a zir miau si lo a ni. Ram changkang zawk New Zealand ah te chuan ni 102 zet hrikai an neih tawh loh hnuah pawh inthlan hun siamremin Oct. 17th a inthlan mai tur an ti a ni awm e. Keini chuan nawrna nasa tak a awm chung pawhin Inthlan ngei chu kan tum lui ta tlat tho a nih kha. Hripui leng vel lah chuan khawilai chin nge a thlen tih a hriattheih miau bawk si lo a, Aizawl khawpui chhung hmun thenkhat phei chu Inthlanni ngei pawh hian lockdown a ngaih phah hial bawk nghe nghe a ni.

Tichuan kan inthlang ta. Kan inthlang ta ngei a. Inthlannia mipui chetvel dan atang khan hripui hlau chung chunga inthlannaa kal chu an awm ngei nain a tam zawkah chuan hripui leng hre lo ang maia innek luih luih te, social distancing ngai pawimawh lo taka inchibai ta lawp lawp te hmuh tur a tam hle mai. Hmun thenkhatah te chuan chaw eikhawm lo buatsaih te an awm bawk a, hripui leng hi kan lo hlau lo tawp a nih hi tih mai tur a ni. Face mask leh sanitizer te chu min vengtu leh min chhanhimtu atana hman a nih rualin inthlanniah meuh chuan kan pawisak lohzia a lo lang leh tho si a. Inthlanna hmun (Polling station)ah ngei pawh chuan a hmanrua ber Rubber stamp chu sanitize a nih thu hriat a ni lo a, voter tan glove hman tur sem a nih thu hriat a ni bawk lo. Hengte vang hian vawiin thlenga Covid kai thar kan neih belh ta zel te hi Inthlanna buatsaih vang a ni ber lawm ni le? Chuti a nih chuan Social Crime a ni thei mai lawm ni? Sorkar lam atanga mipui hriatthiamna emaw ngaihdam dilna emaw thu kan la hre lo zel hian Inthlanna neih chu Covid hri thehdarhna hmun nia puh ala ni lo nia hriat a ni. Inthlan hma aia 23.29% a Covid positive pung ta te, Aizawl khawpuia Quarantine Center indaih ta lo te, Sept. 9, 2020 nia Positive 141 kan neih thar zinga mi 70 zet te chu Election kaihhnawiha duty an ni te, Inthlanna hmuna RO leh PO te, Counting Agent te, Counting Hall chhunga duty te ngei swap sample laksak an ni lo nia hriat te, Zemabawk tlangau-in P/S-III-a vote thlak zawng zawngte a rang thei ang bera YMA hruaitute hnena in report vek tur tih te atang ringawt pawh hian Inthlan vang hian Covid hripui hi a darh ngei a ni a tih theih tho lawng maw?

Kan hriat theuh angin Local Council leh Village Council hmasa te kha kum 2015 a thlan chhuah te an ni a, kumin May 7 hian an term tawp tur a ni. Nimahsela kan sorkar chuan an term hi pawtseiin Aug. 7, 2020 thlengin a pawhsei sak a. Hripui leng vangin inthlan a rem leh si loh avangin Sept. 7, 2020 thlengin a pawtsei leh a ni a, Aug. 27 nia inthlanna nei turin ruahmanna a siam ta a ni. Sept. 1 -3 chhungin Assembly Session neih tur a awm dawn vanga hetia Aug. 27 hi ruahmanna nei nge kan nih pawh chu keini mimawl tana hriat phak a ni bawk si lo ale. |henkhatte lahin 15th Finance Commission atanga Local Council leh Village Council tana Local Body Fund Mizoram tana 93 Crores a dah mek sem zawh la ni lo a, sem hmabak la awm chan an beisei vang a ni an ti bawk a. Thu chiang tak hre lem lo tan pawh heti taka hmanhmawh a ni hi chhan enge maw tak a awm a ni ngei ang tih a rin theih bawk awm e. A mak a, hriatthiam a har a nih ber hi.

Hetiang taka kan sorkarin mipui tana himna a ngaihthah ta mai hi hriatthiam a har hle, mipui himna aiin khawtlang roreltu neih chu a ngai pawimawh zawk em ni? A tih loh theih loh a ni. Khawtlang roreltute hi an pawimawh em em a, State sorkar tel lo pawhin hna nasa takin a thawk thei reng a ni. Local Council leh Village Council hruaitute hi tunhma lam zawng zawngah te kha chuan sorkar lai chan kan ti thin a ni a, tuna roreltu ni mekte hi Congress sorkar laia thlan an nih vanga thlak duh nge a nih tih pawh hi zawhna lian tak a ni thei bawk ngei ang. Engpawh nisela, tun tum Local Council leh Village kan inthlang zet chuan hriatreng a hlawh tawh dawn a, mak tiin kan la sawi reng dawn a nih hi.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy