July 8 khan Jharkhand Assembly-ah Hemant Soren sorkar chuan trust vote a paltlang a. Jharkhand Mukti Morcha (JMM) MLA 45 te chuan motion thlawp zawnga vote in Opposition te erawh an chhuak tau thung a ni.
Motion neih hmaa debate-ah Hemant Soren chuan BJP te chu central agencies te an hmangsual tiin a sawisel na hle a. Soren hi tun hnai lawkah land scam case-ah Jharkhand High Court in bail in a chhuah a ni.
Soren-an thu a sawi veleh BJP MLA te chuan lo au elin constitition tih chhiat tum an tihkum a. Soren thusawi tibuai turin House well ah an pungkhawm bawk.
“Assembly election neih leh hunah BJP MLA tuna au ruai ruai zahve pawh hian assembly in thleng pha tawh lovang. Anmahni dodaltute lakah central agencies te hmangin phiarrukna an kalpui thin. Money power hmangtu dik tak te niin horse trading tihnana operation lotus kalpuitute an ni,” tiin Soren chuan a sawi.
CM hlui Champai Soren pawhin thusawina a neihah, “Party pahnih ten sorkar siam turin hun remchang an nei ve ve a, mahse beisei angin thil a awm lo a ni mai. State-ah tribal population a tlahniam tawh a, democracy-ah chuan alliance te thutlukna pawma kal a ngai a. Rilru dik nen hma lam hun thlirin kan pen a ngai a, mipuite duhdan kan zahsak a ngai a ni,” tiin a sawi a. Thla nga a CM chhungin party thutlukna chu a tihlawhtling vek tiin a sawi bawk.
Leader of the Opposition Amar Kumar Bauri chuan Soren leh Congress te dem thungin, “Hemant Soren an an sorkar chuan unemployment allowance pek an ni ang a ti a. An pe lo a nih chuan politics a chawlhsan ang a ti a. Sorkar hian a bum a ni, kum upa te pawhin thla li chhung pension an dawng tawh lo. Examination-ah thil fel lo a awm bawk a, sorkar hian examination chu blacklist company a conduct tir a ni. |halai te tana hna 5 lakh siam intiam chu tihhlawhtlin a ni lo va, he state-a tribal te dinhmun a derthawng a ni. He sorkar hian corruption record a khum vek a, pawngsual leh tualthah he state-ah hian a hluar hle,” tiin a sawi.
Jharkhand Assembly-ah hian Seat 81 a awm a, mahse, seat nga a ruah avangin member 76 an awm mek thung a ni.
Hemant Soren an fiahna paltlang
