Hepatitis vangin 1.3 million thi

World Health Organisation chuan hepatitis chu natna kai theih nunna chhattu lian ber pahnihna a ni tawh tia sawiin khawvel pumah kum tinin hepatitis avangin nunna chan 1.3 million vel an awm ziah tiin a sawi.
WHO 2024 Global Hepatitis Report chuan ram 187 atanga data te zirchianna neih a pholanah kum 2019 khan hepatitis avanga nunna chan 1.1 million an awm laiin kum 2022 khan 1.3 million an awm tling tawh a ti a. Heng zinga 83% chu hepatitis B avanga thi niin hepatitis C avanga thi 17% an ni a ti bawk a.
“Nitinin khawvel pumah hepatitis B leh C avangin mi 3,500 nunna chanin an awm zel a ni” tiin World Hepatitis Summit neihnaah tarlan a ni a.
Hepatitis B leh C avanga nunna chan hmun thuma thena hmun hnih dawn chu Bangladesh, China, Ethiopia, India, Indonesia, Nigeria, Pakistan, the Philippines, Russia leh Vietnam a awm an ni bawk.
Heng ram 10 ah te hian kum 2025 hma ngeiin natna hmuhchhuah, dan theihna lam, enkawlna chu African Region te nen tihchak nasat chu Sustainable Development Goals tihhlawhtlinna kawnga pawimawh a ni tiin UN health agency chuan thuchhuah an siamah an tarlang bawk a.
“Khawvel huapin hepatitis kai tur venna lama hmasawnna nasa tak awm tawh laiin nunna chan an pung zel chu hepatitis vei an ni tih hriat har lutuk leh enkawl har vang a ni” tiin WHO Director-General Dr Tedros Adhanom Ghebreyesus chuan a awi a. “WHO chuan heng ram tena hmanrua an mamawh an neih theih nan, nunna chhanhim a nih theih nan theihtawp chhuahin a pui dawn a ni” tiin a sawi bawk.
WHO chuan kum 2022 khan khawvel pumah hepatitis B vei mi 254 million leh hepatitis C vei mi 50 million an awm a ti a, a zahve lawih chu chronic hepatitis B leh C te niin kum 30-54 inkar an tam ber a, 12% chu naupang kum 18 hnuai lam an ni a, a pumpuiah 58% lawih chu mipa an ni a ti bawk.
Khawvel huapa hepatitis enkawlna lamah WHO 2024 Global Hepatitis Report chuan a nekawlna man lehservice delivery in ang lo leh intluk lo nuai te bakah funding te chu harsatna siamtu tiin a sawi bawk a.
Hepatitis chu kum 2030 ah umbo hman tum niin chumi atan chuan testing leh diagnistics access tihzauh te, enkawlna man tihtlawm te, primary care prevention lam tihchak te chu hmalakna tura chhawpchhuah zingah a tel a ni.