Mizoramah heroin a hluar a, a man pawh an man hnem. Mahse kum liam taa an man kha a hma kuma mi aiin a tlem a, heroin man tam hi heroin hluarzia tilangtu a nih chuan heroin man zat a tlahniam hi thil lawmawm lamah a ngaih theih ang.
Mizoram Excise & Narcotics (MEN) department-in 2024 chhung khan heroin hi kg 46.680 an man a, Mizoram Police te’n 2024-ah kg 73.03 an man.
MEN department hian 2023 khan kg 76.058 lai mai an man a, 2023 hi an man tam ber kum pawh a ni. Nikuma an man aiin a tam a, mahse 2024-a an man hi a tam tham hle.
2024-ah police te’n kg 73.03 an man bawk a, MEN department leh police te man hi a vaiin kg 199 chuang niin, hetoin hetiang zat hi tam tham tak a ni.
MEN department hian 2018 thleng kha chuan kum khatah kg 10 an man tling ngai lo a, 2019 atangin kg 10 an man tling ta ziah a ni mai lo, a pun dan hi mak tih tham a ni. 2019-ah kg 12.596 an man a, 2020-ah kg 11.71, 2021-ah kg 18.906 a tling a, 2022-ah phei chuan kg 33.418 a kai ta dawrh. Chu aia tam chu 2023-ah an man leh bawk.
Heroin an man tam a, mahse thu lawmawm lam a awm; MEN department hotute chuan a hlawm tam thama an man hi Mizorama mi tur ni lovin hjmun danga mi tur a ni deuh zel an ti.
Mizoramah heroin a hluar ngei a, mahse heroin tawlh ruk kawng a nih avangin Mizoramah hian man tur a pung tiin an sawi a, state danga mi tur a tam tih an sawi.
Heroin man hnem, mahse kum hmasa ami aiin tlem
