Heroin tawlhnaah an veng mi a tel ve avangin ngaihdam dil

Heroin tawlhnaah an veng mi a tel ve avangin ngaihdam dil
Aizawl Venglai khawtlang chuan an veng mi heroin tawlhnaa a lo inhnamhnawih ve avangin Zoram mipui hnenah ngaihdam an dil tih an sawi a. A thubuai chinfel a nih hma chuan an veng chhung rap rih lo turin an hriattir.
Thudawn danin, kumin July 10 zan khan Zokhawthar Police chuan Zokhawthar chhehvelah foot patrolling an nei a. Zan dar 8.00 velah satha ip hring, ruihhlo dahna ni ngeia hriat chu Kudamsen Kai, Zokhawtharah an chhar a. A hnu lawkah a bulhnaia mi pakhat – Lalnuntluanga (20) Khawmawi Myanmar, Kudamsen Zokhawthara cheng mek nia inchhal chu manin, satha ip hi Khawmawi Myanmar atanga a ken leh helai hmuna a dah a nih thu a inpuang a ni.
Hemi hnu hian thuhretu civil mi pahnih hriatpuinain satha ip hi hawn a ni a, a chhungah hian heroin nia hriat hmuh a ni. Aluminium foil hmanga uluk taka tuam niin, a tuamna aluminium foil-ah hian ‘Double UOGlobe Brand’ tih a chuang a ni. Thudawn danin, Double UOGlobe hming hi Asia-Pacific ruihhlo tawlhruknaah, heroin fir ber chi (99.9%) siam leh tawlh kawnga hriat lar a ni. A vaiin kg 7.422 a ni a, an hralh thinna ang chuan Rs. 2,22,66,000 hu nia chhut a ni.
Police-ten an chhui zui zelnaah he thila inhnamhnawih midang pathum – Lalhriatliana (28) Tahan ‘C’ Group Myanmar leh Chunglianawia (37) Khampa, Myanmar, tuna Zokhawthara cheng mek ve ve leh Tialvangi (44) Zokhawthar an man leh a ni.
An inpuanna atangin leh CID(SB) puihnain Champhai Police hian Saitual district Keifangah H Lalrinsanga (49) Aizawl Venglai nia inchhal an man belh bawk.
Hemi chungchangah hian Aizawl Venglai local council kaihhruaiin all NGO an thukhawm a. heroin mannaa an veng mi a inhnamhnawih tih an hriatin pawi an ti a, Mizoram mipui hnenah ngaihdam an dil tih sawiin, ‘Sawrkarin ruihhlo tih rem tuma theihtawp a chhuah mek lai a, kan veng mi ruihhlo chungchangah ram leh hnam tihmualpho theihna thilah a lo inhnamhnawih hi pawi kan tiin kan dem takzet a. Sawrkar thuneituten a chungah dan anga na taka action la turin kan ngen a. Hemi kawngah hian sawrkar thutlukna veng mipuiin kan thlawp a ni,’ a ti a. H Lalrinsanga chu a thubuai chinfel a nih hma chu vengchhung a rah an remti tawh rih lo tih an sawi a ni.