Heroin tawlhtu lian Mizo
pahnih Delhi-ah an man
Kumina heroin tam tham tak mannaa a meizanghlaptu ber nia ngaih mi pahnih chu tunhnai khan Mizoram Police-in New Delhi-ah an zuk man.
Kumin July 10 khan Zokhawthar Police chuan bricktype heroin fir, kg. 7.422 chu Kudamsen Kai Zokhawthar-ah an man a, he thila inhnamhnawih mi 5 an man a ni. An chhuizui zelnaah heroin neitu ber nia hriat Lalchhuanthangi (50), Khatla South Aizawl, tuna Delhi-a khawsa mek chu Delhi-ah hian kumin November 4 khan Mizoram Police-in an zu man.
Lalchhuanthangi hi India leh Myanmar inkara ruihhlo tawlhruknaa a meizang hlaptu nia hriat a ni a. Amah hi Thailand-ah pawh ruihhlo thubuai vangin kum 8 (2014- 2022) lung in tang tawh nia sawi; kum 2023-a Kerala state-a pawisa thila inbumna (money scam case) thubuai nei lai, tun tuma an man pawh hian he pawisa thubuaia bail-a a chhuah lai nia hriat a ni. Dwarka Court-in phalna a pek angin amah hi Mizoram panpui mek a ni.
Mizoram Police-in tum khata heroin a man tam ber, Saitual Police-in kumin August 23-a an mannaa a neitu ber nia hriat Joseph Lianthangpuia (42) Chanakya Place New Delhi pawh Mizoram Police hian Delhi-ah vek November 5 khan an man a, an rawn hawpui mek
He case-ah hian lirthei pakhat MZ-01 X 1909, Lalliancheua (20) Falam Myanmar khalh atangin heroin kg.15 man a ni.
Thubuaia inhnamhnawih man kawngah hian Delhi Police leh Special Bureau an pawimawh hle a, an thawhpuina azarah misualte man niin, court-a phalna lak leh thlawhnaa inphurh thlengin an zarah tluang takin thil kalpui a ni. An chungah Mizoram Police hian lawmthu a sawi a ni.
Heroin tawlhtu lian Mizo pahnih Delhi-ah an man
