High Court building thar enfiah
Chief minister Zoramthanga leh Gauhati High Court Chief Justice, Justice Sandeep Mehta chuan Thawhlehni khan MINECO-a sak High Court building chu a hmunah an enfiah a. Law & Judicial minister TJ Lalnuntluanga, Justice Michael Zothankhuma, Justice Marli Vankung, Chief Secretary Dr Renu Sharma bakah state sawrkar leh judiciary-a hotu dangten an tawiawm.
Chief minister chuan Gauhati High Court chief justice-in Mizoram a rawn tlawh chu lawmawm tiin, High Court building thar chu hawn thuai a nih a, tangkai taka hman a beisei thu a sawi a. State sawrkar atanga mamawhte a awm a nih chuan a inhawng reng tih a sawi a ni.
Chief justice Sandeep Mehta chuan High Court building sak chungchangah a bulthut atanga a hmawrbawk thlenga Mizoram sawrkar duhsakna avangin lawmthu a sawi a. Building changtlung tak sak a nih avang leh sawrkar laipuiin e-complaint tura court system a beisei angte chu ngaihpawimawh a nih danah lawmthu a sawi. Court building chu state dang tan pawh entawntlak tak a nih thu sawiin, hun rei lo teah hawna luah luh thuai a beisei tih a sawi a ni.
PWD engineer-te report danin, High Court building hi NLCPR atanga sum, nuai 4624 hmuh hmanga sak niin, heng bakah hian sum sanction-in a ken tel loh tul leh mamawh dangte siamna’n state sawrkarin SEDP leh sum hnar dang atangin hna thawh a ni. Basement, ground floor, 1st floor leh 2nd floor a awm a ni.
High Court building thar enfiah
