History siamtu Indian football club Minerva
Minerva Academy Football Club chuan record thar siamin Indian club zinga Denmark rama khelh Dana Cup champion hmasaber an ni.
Punjab team hian Under-14 title an lakna tournament pumpui an thunun hneh hle a, final-a an khingpui Malta atanga thawkchhuak KFF Club chu 15-0 tehrengin an sawp!
He Indian club vek hian Denmark rama trophy an sualchhuah hma chiah chawlhkar mai khan Sweden ramah Gothia Cup title an kawl lai an humhim a, Gothia Cup hi Youth World Cup nena khaikhin hial a ni ve a; Scandinavian ram pahniha title la zawn thei hmasaber an ni nghal.
Hamleta pa thlarau chenchilh thin ram Denmark-a Dana Cup final-ah hian Indian rawlthar club tan Raj chuan hat-trick siamin, Rhythm, Tony Rajesh, Chetan K, Yohenba leh Denamoni-te’n goal hnih diat diat an thawhkhawm a; Ajam leh Chetan T pawhin goal khat ve ve an thawh ve bawk.
Minerva hian semi-final lamah pawh si li faiin Palestine club Rawhel an sawp tawh a; quarter-final lamah phei chuan Artjies lakah 17-1 tehreng hnehna an chang!
Hjorring khua, Denmark rama khelh Dana Cup hi a nep hauh lo a, khawvel huapa youth football tournament lian pathumna tling phain, ram 45 chuang atanga team 1,000 chuang fuankhawmna a ni.
Chuti khawpa tournament lianah chuan Punjab team hian match sarih khelin goal 110 zet an khung tling a, tournament chhungin goal khat chiah an chhuah!
History siamtu Indian football club Minerva
