Pathianni khan Paris 2024 kal laia India medal hmasaber hlawhchhuakin Manu Bhaker chuan Paris Olympics women’s 10m air pistol event-ah bronze medal a kap chhuak a, Thawhlehni khan Chateauroux’s shooting range-ah bawk hian Sarabjot Singh nen thawkdunin 10m air pistol mixed team bronze an hlawhchhuak leh a, kum 22 mi Bhaker hi Independence hnua Olympics Games vawikhata India tana medal pahnih awrh thei hmasaber a ni.
10m air pistol mixed team bronze medal play-off match-ah hian Manu leh kum 22 mi ve bawk Sarabjot-te hian 16-10-in South Korean pair Oh Ye Jin leh Lee Wonho an hmakhalh a, lawmman semna dawhsan hniam ber an lawnkai ta a ni.
Tokyo 2020 kha Bhaker tan Olympic debut niin, eng a ang lo a, Paris-ah erawh India tana history siamtu ropui niin, Kumpinu hnuaia India a kun lai khan British-Indian athlete Norman Pritchard chuan 1900 Olympics-ah silver medal pahnih hlawhchhuakin, a medal laknate chu 200m sprint leh 200m hurdles a ni.
Tarlan tak angin, Pritchard ropui lai kha India indan hma (pre-Independence era) a ni a, British lak atanga India indan hnuah Olympic vawikhata medal pahnih awrh thei India infiammi an chhuak ngai lo a, kumin hian Manu Bhaker kan hmu ta a ni.
Thawhlehnia bronze medallists Manu Bhaker leh Sarabjot Singh-te tluk loh pair hnih chu silver medallists Sevval Ilayda Tarhan leh Yusuf Dikec of Turkey bakah gold medallists Zorana Arunovic leh Damir Mikec of Serbia-te an ni.
Ambala shooter Sarabjot hian Inrinni khan men’s 10m air pistol final a thleng zo lo a, point 577 score chungin pakuana a ni.
History thar siamtu Bhaker chuan a malsawmna dawn avangin lawmthu a sawi a, a hlawhtlinna sualchhuah chu a chhuang hle tih a sawi.
Bhaker hian history dang siambelh turin hun tha a la nei cheu a, women’s 25m pistol eve nt lamah hmabak a la nei a, Zirtawpni atang hian qualification round an tan dawn a, he huanga medal a awrh leh thei a nih chuan India tan Paris 2024 hi Games chhinchhiahtlak tak a ni ngei ang.
A hmabak women’s 25m pistol event-ah hian 2023 World Championships leh 2022 Hangzhou Asian Games-ah gold medal a lo la tawh a, a career-ah World Cup gold medal pakua awrh tling tawhin, tuntum pawh hian medal engemawber hi hlawhchhuak leh thei tura ngaih a ni.
Sarabjot pawh hi World Championship, World Cup leh Asian Games gold-medallist a lo ni ve tawh bawk,
Indian woman shooter zinga Olympic medal la thei hmasaber Manu Bhaker lawmpuitu langsar pakhat Union Sports Minister Mansukh Mandaviya chuan Manu thawhrimna sawichhuak chungin a training senso atana sawrkar insensona a thlawn lo tih a sawi.
TOPS scheme hnuaia mi Bhaker-i training sensoah hian minister chuan cheng vaibelchhe hnih senral a nih thu a puang. Paris Olympic inbuatsaihna kalpui laiin Germany leh Switzerland ramah intuaihriam turin an thawnchhuak a, sawrkar insensona chu bronze medal pahnihin a chhanglet ta phawt a, medal dang beisei tur a la neih hi gold ni tawh turah ngai phawt ang!
India hian shooting-a kum 12 zet Olympic medal a lak zawh tawh loh hnuin hlawhtlinna lian a lawm mek a; Bhaker hi Indian shooter zinga Olympic medal hawn thei pangana chiah a ni.
Overall-ah India hian Independence a hmuh hnu 1948 Olympics atanga Paris 2024 thleng hian individual Olympic medal 23 a thawkchhuak tling ve ta a ni.
Independende hnua Indian zinga Olympic medal awrh thei hmasaber chu KD Jadhav chuan Helsinki khawpuia 1952 Olympic Games-ah khan wrestling atangin bronze medal a awrh a; chu mi hnuah kum 44 zet India chuan Olympic individual medal lawm tur a nei ta lo vang vang a, Atlanta Games 1996-ah khan tennis great Leander Paes chuan bronze a rawn sualchhuak leh nawlh a nih kha.
Shooter Abhinav Bindra chu Indian zinga Olympic individual gold medal la thei hmasaber niin, 2008 Beijing Olympic Games-ah khan men’s 10m air rifle event-ah gold a dawng.
Bindra hnungzuitu kan hmuh leh chu Neeraj Chopra niin, kum thum kalta 2020 Tokyo Olympic Games-ah khan javelin throw-ah gold medal a rawn thawkchhuak ve leh ta a ni.
PV Sindhu leh Sushil Kumar-te chu Indian zinga Olympic vawikhat aia tama medal awrh thei awmchhun niin, Sindhu hian Rio de Janeiro Games 2016-ah khan hmeichhe badminton singles-ah final lutin silver a dawng a; Tokyo-ah bronze medal a awrh zui leh bawk.
Wrestler Sushil thung hian Beijing 2008-ah khan bronze dawngin, kum li hnu London-ah silver a awrh leh.
Olympic-ah hian India hmeichhiate’n medal 10 an thawkchhuak tawh a, chu’ngte chu Sindhu leh Manu Bhaker-te medal pahnih ve ve bakah Karnam Malleshwari, Sakshi Malik, Mirabai Chanu, Lovlina Borgohain, Saina Nehwal leh MC Mary Kom-te hlawhtlinna kha a ni.
Kum 1948-2024 chhunga Olympic-a individual medal
la thei India infiammite:
1.1952 Olympic Games, Helsinki
KD Jadhav – Bronze (Wrestling)
2. 1996 Olympic Games, Atlanta
Leander Paes – Bronze (Tennis)
3. 2000 Olympic Games, Sydney
Karnam Malleswari – Bronze (Weightlifting)
4. 2004 Olympic Games, Athens
Rajyavardhan Singh Rathore – Silver (Shooting)
5. 2008 Olympic Games, Beijing
Abhinav Bindra – Gold (Shooting)
6. 2008 Olympic Games, Beijing
Vijender Singh – Bronze (Boxing)
7. 2008 Olympic Games, Beijing
Sushil Kumar – Bronze (Wrestling)
8. 2012 Olympic Games, London
Sushil Kumar – Silver (Wrestling)
9. 2012 Olympic Games, London
Vijay Kumar – Silver (Shooting)
10. 2012 Olympic Games, London
Gagan Narang – Bronze (Shooting)
11. 2012 Olympic Games, London
M C Mary Kom – Bronze (Boxing)
12. 2012 Olympic Games, London
Saina Nehwal – Bronze (Badminton)
13. 2012 Olympic Games, London
Yogeshwar Dutt – Bronze (Wrestling)
14. 2016 Olympic Games, Rio de Janeiro
P V Sindhu – Silver (Badminton)
15. 2016 Olympic Games, Rio de Janeiro
Sakshi Malik – Bronze (Wrestling)
16. 2020 Olympic Games, Tokyo
P V Sindhu Bronze – (Badminton)
17. 2020 Olympic Games, Tokyo
Mirabai Chanu – Silver (Weightlifting)
18. 2020 Olympic Games, Tokyo
Lovlina Borgohain – Bronze (Boxing)
19. 2020 Olympic Games, Tokyo
Ravi Kumar Dahiya – Silver (Wrestling)
20. 2020 Olympic Games, Tokyo
Bajrang Punia – Bronze (Wrestling)
21. 2020 Olympic Games, Tokyo
Neeraj Chopra – Gold (Javelin Throw)
22. 2024 Olympic Games, Paris
Manu Bhaker – Bronze (Shooting)
23. 2024 Olympic Games, Paris
Manu Bhaker and Sarabjot Singh- Bronze (Shooting)