Daily Newspaper

HIV/AIDS Dona: Ko thlak a ngai…

8

MSACS chhinchhiah danin September 2020 thleng khan Mizoramah HIV hrik pai hmuhchhuah tawh mi 23,092 an awm a. HIV kai zinga zaa 78.01 chu mipat hmeichhiatna atanga kai an ni.

NACO-in a zirchianna thar ber – ‘India HIV Estimates 2019’ kumina tihchhuahah India rama kum 15-49 inkar (Adult HIV Prevalance) HIV hrik kai percent-ah Mizoram pakhatna (2.32%) a ni a, pahnihna Nagaland (1.45%) niin pathumna Manipur (1.18%) a ni.

Manipur hi 2018 khan ‘Adult HIV Prevalance’ ah hian sang berin 1.06% a ni a, Mizoramin dawtin 0.79% a ni ve thung a. Tunah hian Mizoram chu kan sang leh ta ber a, 2.32% kan nih laiin a sang ber ni thin Manipur chu pathumnaah a tla thla a, anmahni rau rauah a sang zawngin kal ve zel bawk mah se, tun dinhmunah 1.18% an ni a, pakhatna an nih lai nen a sanna hi a inthlau tam lo hle a. Mizoram erawh a sang zawngin a kal chak hle a, 0.79% atangin 2.32% ah a zuang ta dawrh tihna a ni.

HIV positive a san chak dan hi a namai tawh lo hle a. March 2020 khan positive 22,130 an awm laiin September 2020-ah chuan 23,092 a ni a, thla ruk chhungin HIV kai thar 962 an awm belh tihna a ni a. Hei hi chawhrualin thla tin mi 160 emaw, nitin mi 5 emaw kai thar awm zel ang a ni ta a ni.

State dangte pawhin HIV positive tlakhniamtir tumin hma an la ve theuh a, Mizoram pawhin theihtawp chu kan chhuah ve bawk a, mahse kan sang chak bik ta lutuk hi inenfiah ngai lai chu a ni ta a. Kalphung ngai ni lo deuh, tun aia sawt zawk tura hma la tura kothlak hi kan mamawh tawh hle tih a lang a ni.

HIV laka himna tura hmanrua tawktarh lian tak condom chungchangah pawh hian, thalaiten condom nena sex hman hrim hrim pawi an tih lohna hi a kai chhuak mai ang tih hlauhawm khawpa kalpui a hlauhthawnawm thei dawn dawnin a lang ta a, zirchian deuh a that hmel khawp mai.

HIV/AIDS donaah hian kohhran lam pawh inhnamhnawih thuk tura beisei an nih angin tun dinhmunah chuan an inrawlh thuk ve ta hle a. HIV positive vei tawhte buaipui kawngah Kohhran tan NGO anga hmalak ve vak a remlohna chin a awm thei ang a, chutih laiin, a pawimawh ber, chhungkaw lama campaign hi kohhran hian ngawrh taka a kalpui theih chuan, tuna naupang thang lian mekte HIV laka an him theihna turah a pawimawh hlein a rinawm. Tuna HIV kai hluarna ber mipat hmeichhiatna hman chungchangah hian, pawn chhuah tam loh hi thil pawimawh tak a nih hmel a, chu chu kohhran hian chhungkaw tinah tan a lak theihna tur niin a lang bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy