HIV leh a kaihhnawiha hma la tha
district pali ho chawimawina hlan
Mizoram State AIDS Control Society buatsaih, Surakshit districts (Mobilization for AIDS Suraksha) chawimawina, Samaan Samaaroh chu Nilaini khan Aizawlah neih a ni a. Hmanpuitu Health & Family Welfare minister Lalrinpuii chuan tunhnaia Surakshit district-a puan tak Mizorama district pali – Saitual, Mamit, Hnahthial leh Khawzawl district hotute hnenah lawmpuina thilpek a hlan.
Minister chuan, Mizoram hmasawnna a taka tarlanna tura district pali lawmpui leh chawimawa an ni lawmawm a tih thu a sawi a. National AIDS Control Organisation ruahmana kumin December 1 ralhmaa 95:95:95 target leh triple elimination (nu atanga naupai laia HIV, Syphilis leh Hepatitis-B-inkaichhawng tur umbo) hlawhtlin a, chumi hmanga 2027 December 1-a HIV, Syphilis leh Hepetatis B hri darh zel tur khuahkhirh hman chu sawrkar thil tum lian ber a ni tih a sawi.
He hmalakna hnuaia target pathum tlin vek a, Surakshit district nihna changtu district pali thawhhona leh inpekna fakawm a tih thu Lalrinpuii hian a sawi a. Heng district-a sawrkar hotute, tlawmngai pawl leh kohhran chu tha thlah loa tang zel turin a fuih. Hetihrual hian Saksham district 5 – Siaha, Lawngtlai, Serchhip, Kolasib, Champhai leh Sangharsheel district 2 – Lunglei leh Aizawl pawh tan la a, Surakshit dinhmun thleng thuai theia tan la turin a chah bawk.
District thuneitute hian Surakshit dinhmuna hlankai an nihna kawnga hma an lak dan tlangpui an sawizau a ni.
HIV leh a kaihhnawiha hma la tha district pali ho chawimawina hlan
