‘He lei ram mi kan ni lo’ tih hla hi Mizo zingah hre lo hulhual an awm kher lo ang a, a thunawn “Hla taka ram mawiah chuan…” tih lai phei chu zaipawl hla lar, mipui pawhin tui taka an sak thin a ni.
He hla phuahtu V Thangzauva (79) hi February ni 15 khan heart attack vangin a boral a, hla taka ram mawiah a chawl ta.
Tlai dar 3.30-ah a boral a, a zanah Lamka-a Hmuia Venga an chenna inah tlaivarpui niin, Chawlhni khan vui liam a ni a, mi thahnem takin an thlah liam a ni.
V Thangzauva hian hla 200 a phuah a, ‘He lei ram mi kan ni lo’ tih te, ‘Eloi, Eloi, Lama Sabakthani’ tih te, ‘Maranatha’ tih te, ‘Ka buaina ram thlalerah hian’ tihte phei chu hmun hrang hranga Zofate zinga hla lar a tling.
Lamka Chhim Presbyterian Kohhran mi a ni a, 1988 khan Manipur Synod Choir-in album an siam a, he album-a an hla sakah ‘Halleluiah Chorus’ tih loh hla dang zawng chu V Thangzauva phuah vek a ni.
V Thangzauva hi Biate, Mizorama piang a ni a, a nu boral hnuah, 1960-ah eizawnna dapin Lamka, Manipur-ah a pa (Chalkhuma) hovin an pem a ni.
Nupui a neih hnuah hla a phuah tan a, a hla hmasa ber chu Krismas hla a ni. Nungcha humhalhna hla te, YMA hla te, ramngaih hlate a phuah a, sap tawnga a phuah, Mizo tawnga a lehlin leh te pawh a awm.
Mi lungleng chi, zai ngaina mi a ni a, ramvah nuam ti mi a ni bawk. Thla en zanah chuan ‘Buannel ram dai’ tih hla a sa ngei ngei tiin a fate’n an sawi.
Eizawnna lamah Manipur sorkar hnuaiah a thawk a, industries department-ah economic surveyor a ni thin. A nupui |haluti nen fa pasarih an nei.
Hla taka ram mawiah V Thangzauva chawl ta
