Hlakungpui Mual-ah seminar nei
Mizo Hlakungpui Mual Committee huaihawtin Nilaini khan Khawbungah international seminar neih a ni a. Tun tum hi hetiang seminar neih thawh 6-na a ni.
Hmanpuitu Tourism minister Lalnghinglova Hmar chuan, Khawbung khua chu mahni inchawimawi thiam tak leh khaw inlungrual, khaw entawn tlak tak an ni tih a sawi a. Khawi hmunah pawh awm ila, mahni chawrchhuahna hrerengte an hming a mawi thin, tiin, “Ram dang leh state dang tu mahin haw runpui an nei ve ngai loa, Mizote chauh neih thin an ni. Kan khua kan hmangaihna hi kan thil neih ropui tak a ni,” a ti.
Mizo Hlakungpui Mual seminar puala buatsaih souvenir “Zo Tui” tih lehkhabu chu minister hian a tlangzarh nghal a ni.
Hmanpuitu dang adviser to chief minister (Political) Lalmuanpuia Punte chuan, Pu Patea leh Pu Damhauha te pahniha bul tan Hlakungpui Mual, tuna Mizoram puma hlut hlawh khawpa an buatsaih thei chu lawmawm a tih thu a sawi a, Pu Patea leh Pu Damhauha te chanchin ziahna lehkhabu a tlangzarh ve bawk.
Seminar-ah hian Mizo Hlakungpui Muala sengluhte thu leh hla zirho a ni.
Kum 1986 khan seminar thawh khatna neih a ni a, kum 1996 khan a thawh hnihna neiin, kum 2006, 2011 leh 2016 ah neih a lo ni tawh bawk. Tun tumah hian resource person-ah Zalianthanga (journalist – Tahan); Lalzuitluanga (assistant professor – Churachandpur College Manipur) leh Dr Sangrozami (associate professor – Govt. J Thankima College Aizawl) an ni.
Hlakungpui Mual-ah seminar nei
