Hliam nei chungin party pathumin LMC inthlan hmachhawn
Ram leh hnam tana beitu party lian pathumin hliam nei chungin Lunglei Municipal Council (LMC) inthlan lo awm tur an hmachhawn mek a, inthlan zawha la hliam belh tur te pawh an awm nia ngaih a ni.
Tun thla ni 29-a inthlang tur LMC-ah MNF, Congress party leh ZPM te’n theihtawp an chhuah mek a, hliam nei party pathumte hian an hliam an tuam dam rih lo tih thu dawn a ni.
State-a sorkarna chang mektu MNF hi Lungleiah an inrem fuh thei lo a, nikum lam atangin MNF Sub Headquarters, Lunglei hruaitu an inthlak sek. Chutianga khi chung chuan inthlan an hmachhawn mek.
Lunglei-a RT-PCR khawl bun loh chungchangah te, kawng chhia chungchangah te Lunglei-ah MNF hian beih an tawk a, chutiang karah party chhungah harsatna a lo awm bawk nen, chutiang nuai chung chuan MNF hi an campaign tih thu dawn a ni.
Congress party-ah pawh neuh neuh a awm a, Lunglei District Congress Committee (LDCC) an khi mek tih thu dawn a ni.
LDCC hi tun hnaiah an inthlang a, post pakhatah chuan a tling lo lam an lawm lo hle. An inthlana ding pakhat chuan tun hnaiah ZPM a zawm nghe nghe.
ZPM pawhin harsatna an nei a, nikum lama an inthlan hnua an khi kha, an la pum lo tih thu dawn a ni.
Nikum lamah ZPM Southern Headquarters an inthlang a, he inthlanah hian thuang hnihin an chuh. Heta an hliam hi a la dam lo a, an mi pawimawh tak pakhat MLA inthlana a lo din tawhna biala ding tura mi dang sawm rawt pawl an awm bawk tih thu dawn a ni.
Lunglei-a tlawmngai pawl hruaitu langsar pakhat, a hming tarlan rem lo chuan party lian pathumte hi LMC inthlan hnuah tuna an hliam neih hi a zual thei niin a sawi a, inthlanpui dawna candidate an thlan dan azirin lungawi lo pawh an awm nual thei tih a sawi bawk.
Hliam nei chungin party pathumin LMC inthlan hmachhawn
![](https://theaizawlpost.org/wp-content/uploads/tap_logo-min-large.jpg)