An khelhna club tana an beihna lama kartawp game-a inhliam Morgan Gibbs-White, Ezri Konsa leh Kobbie Mainoo-te chu Nations League match lama Greece leh Finland hmachhawn mai tur England squad atangin an inhnukdawk a, he thu buatsaih lai thleng hian an aiawhtu tur dahluh a la ni lo a, interim manager Lee Carsley hian a player inhliamte hmunruak hnawhkhah tumna a nei lo tih media lamin an tarlang.
Thla hmasa maia a England debut nghakchhuak hlimhlawt Nottingham Forest midfielder Gibbs-White hian kartawp Premier League inkhel pakhata Chelsea nen sikhat ve ve thuna an inhnehtawk tum khan shot a danna lamah hliam a tuar a; Aston Villa defender Konsa thung hian Pathiannia goal awm loa Manchester United an draw tum khan a kaihza tha tinain, United midfielder Mainoo pawh match tawp lamah hliam avang bawkin lakchhuah a ni.
Captain Harry Kane erawh Inrinni Bundesliga match-a Bayern Munich leh Frankfurt inhnehtawk tum khan match tawp hmain lachhuak mah se England medical staff lamin an endiknaah a fit tih puan a ni hlauh thung.
Three Lions hian naktuk zan hian Wembley-ah Greece an mikhual ang a, kartawp Pathianni zanah Finland nen Helsinki khawpuiah an innuai zui ang.
Tuna player pathum inpuchhuak ta te tih loh Lee Carsley squad puan taka hming lang dang 22-te chu kim takin England team inbuatsaihna St George’s Park-ah an in report thunh.
Manager nghet an neih hmaa England team lo hruai tura ruat Carsley hian kum sarih chhunga a vawikhatna atan Tottenham striker Dominic Solanke chu squad-ah a telh a; kum 2017 khan a vawikhatna atan Solanke hi England squad-ah telh a ni a, kha mi hnuah tun hi ram tana koh a hlawh leh vawikhatna chiah a ni!
Nations League squad-ah hian tun season bul tan fuh zet Aston Villa midfielder Morgan Rogers hmuh tur a awm lo teh tlat a; Manchester United defender Harry Maguire, Tottenham playmaker James Maddison leh Crystal Palace winger Eberechi Eze-te pawh koh loh langsar zingah an tel.
Ram tana match 90 khel tling tawh Kyle Walker kha Carsley squad hmasaberah khan hmuh tur awm lo mah se tuntum hian kohkir a ni a; hliam avanga September thla fixture-ho khel ve thei ta lo Real Madrid star player ni mekJude Bellingham pawh squad tharah telh a ni ve leh ta.
England interim manager a nih hnuah Carsley hian khawng takin a team enkawl chu bul a tanpui a, thla hmasa mai khan Nations League match-ah a ho hian Three Lions chuan Finland leh Republic of Ireland an hneh.
Hliam tihbuai England squad
