Hlimen leimin tuartu thenkhat relief camp-ah

Hlimen leimin tuartu chhungkaw thenkhat chu relief camp-ah an lut tawh a, a tam zawkte awmna tur sak tum mek a la ni.
Hlimen atanga thu dawn danin, khawtlangin relief camp an sa a, June ni 22 atanga khan camp hi an luah tan. Chhungkaw 10 an lut tawh.
May ni 28-ah remal cyclone leh ruahpui vangin Hlimen-ah hian lei a min nasa a, chhungkaw engemaw zat a nghawng a ni. Leimin tuartu hi, chenna in chhia leh an awmna hmun a him lo, DC-in insawn chhuak tura a tih chhungkaw 44 vel an awm a, heng zinga tel lo, an awmna a him lova an hriat avanga hmun danga insawn duh an awm nual bawk.
Local Council leh Branch YMA kaihhruaiin khawtlangin Central Workshop hmunah relief camp hi an sa a, an hruaitute chuan bungrua hi a baa an lak tawp thu leh sorkarin a rul turah an ngaih thu te an sawi.
Leimin tuarte chungchangah hian sawi neuh neuh a awm a, sorkarin cheng nuai 6 lek a pe tih te, chu pawh chu an la dawng chuang lo tih te sawi a awm. Hlimen khawtlang hruaitu lam chuan cheng nuai 6 hi mi thenkhatin an lo la kawi ve bawk nia a lan thu an sawi a, sorkar hruaitute’n silpaulin te zara cheng nuai 6-a camp hi sak theih turah an ngai a, khawtlang hruaitute’n thil awmzia an han sawi a, official lamin cheng nuai 6 senga silpaulin zara sak mai chi a nih loh thu, sorkar a mualpho mai ang asin tiin an hrilhfiah bawk a, sorkar hruaitu lam pawhin hei hi an pawm niin a lang an ti.
Sorkar hmunah relief camp hi an sa a, utilisation certificate thehlut tura tih an nih thu leh, sorkarin senso hi a tum tur a nih thu an sawi.
Mahni in chhuahsantute zingah mahni chhungte bel an awm a, Hlimen Primary School I, Hlime Middle School II leh anganwadi-a awm an awm bawk. A tam zawk awmna tur hi sak a la ngai a, a hmun ngaiah hian sak leh tum a ni.
DC-in fimkhur thu-a mahni chenna in chhuahsan tura a tih chhungkaw hrang hrangah hian mi (member) 186 an awm a, an zinga 131 chu naupang an ni. Mahni duhthu-a hmun danga insawn duh an awm nual bawk.