Nilaini khan Star Cement MPL 13 round 7-na khelh chhunzawm a ni a, table chung lam luahtu pahnih Aizawl FC leh Mizoram Police FC te an inhnehtawk. MPL 13-a bul tan tha tak Aizawl FC hi an khelh hnuhnung vawi hnihah an chak zo lo zawn. MPFC lakah chak zo lo mah se Aizawl FC tana goal thuntu chu Zomuansanga bawk a ni.
MPL a champion tawh ve ve Aizawl FC leh Mizoram Police FC te hi season kal mekah chetha a, tlawm la nei lo ve ve niin an inhmachhawn tur pawh hian ngaihven a hlawh hle. Ngaihven an hlawh ang ngeiin inkhel hmuhnawm tak an lantir a, result pawh a fair tawk viau a, 1-1 in an inhnehtawk.
Table chung luahtu pahnihte inkhelah hi a hmuhnawm a, goal thun tumin an innawr tawn nasa hle. Inkhel hmuhnawm takah chawlhlawk hmain goal lut a awm thei lo phawt a, team hnihte mual laiah an indangchat tawn nasa hle. Chawlhlawk hmain goal lut awm thei lo mah se chawlhlawk hnu lamah goal khat ve ve an thun thung.
Aizawl FC tan hian an goal thun kh^wl Zomuansanga chuan minute 56-naah hmahruaina goal a thun. MPL season khatah goal thun hnem ber record lo siam tawhtu Khawbel tlangval Zomuana hian MPL 13-ah pawh goal a thun chho leh mawlh mawlh a, Golden Boot dawn tuma intlansiaknaah hma a hruai fal leh reng tawh. I Day 2026 a top-scorer Zomuana goal thun hmanga hma an hruai vangin Aizawl FC an phur a, chak ngei tumin tan an khawh zui nasa hle.
Table chung bera awm Aizawl FC lakah goal chhuah bawk mahse Mizoram Police FC an buai zui lova, tawnhriat an neih that an chhawr tangkaia fim takin an inlan zui ta zawk.An si phurh ngei tuma tan khawh MPFC hi an hlawhtling har lo. MPFC tan hian C Zodinmawia chuan minute 69-naah goal thunin an si phurh a sut.
Goal khat ve ve an thun hnuin inkhel a hmuhnawm zui viau a, goal thun tumin an innawr tawn nasa hle. Inkhel hmuhnawm takah goal dang a luh belh thei lova, team lian Aizawl FC leh Mizoram Police FC te chu 1-1 in an inhnehtawk zui ta a ni. An inkhelah chak zawk an awm theih loh vangin Aizawl FC in khelh 7 atanga point 17 hmuin table chung ber an luah a, pahnihna luah zui Mizoram Police FC nen an inkarah point 4 a tla zep chhunzawm.
MLS FC in Dinthar FC an lehthal
Thawhlehni khan MPL 13, round 7-na hi khelh tan a ni a, inkhel hmuhnawm takah MLS FC chuan Dinthar FC an lehthal a, point thum hlu tak an hmu. Thawhlehni a inkhel dangah Ramthar Veng FC leh Kanan FC te 1-1 in an inhnehtawk ve bawk a. Kanan FC in point an hmu zawn.
Table-ah pangana luah mektu MLS FC hian pathumnaa awm mek Dinthar FC lakah bul an tan tha lova, goal an chhuah thuai. Dinthar FC tan hian K Lalhminghluta chuan minute 29-naah hmahruaina goal a thun. Vala goal thun hmangin hma an hruai deuh reng a. MLS FC tan Laldinsanga chuan minute 41-naah goal thunin an si phurh a sut a, 1-1 a inhehtawk chungin chawlhlawk an hmang.
Chawlhlawk hnu lamah MLS FC an khel tha chhunzawm a, bench atanga lut Falton Beirachakhei chuan minute 63-naah hma an hruai letna leh an chakna ni zui ta goal a thun. He goal hmang hian MLS FC in Dinthar FC lakah point thum hlu tak an hmu a, khelh 7 atanga point 10 hmuin pathumnaah an inhlangkai a, an hneh tak Dinthar FC an lehpel.
Thawhlehni a inkhel dangah table mawngphah luah nghet tlattu Kanan FC in point khat an hmu ve leh nawlh a, an khingpui Ramthar Veng FC nen 1-1 in an inhnehtawk.
Ramthar Veng FC tan hian J Lalbiakliana chuan minute 51-naah hmahruaina goal a thun. Point thum hmuh an beisei hman viau laiin Kanan FC tan Malsawmzela chuan minute 61-naah goal thunin an si phurh a sut. Hun tawp thlengin goal dang a luh belh thei tawh lova, inkhel hmuhnawm tak chu 1-1 in a tawp zui ta a ni.
Hmahruaitu Aizawl FC an chak zo lo zawn
