Ningani zana UEFA Nations League khelhah England chuan 3-0 in Greece an hneh. Three Lions hian Wembley Stadium-a a hneh loh Greece lakah phuba an la. Greece an hneh vangin England hi League B, Group 2-ah hmahruaitu thar an ni a, League A-ah kaisan an hnaih leh viau tawh.
Manager lailawk Lee Carsley hnuaia inlan England hian an lenluhna mual Athens Olympic Stadium-ah bul an tan tha viau a, goal an thun hma hle. Inkhel tan atanga minute sarihna lekah captain Harry Kane aia lut Ollie Watkins chuan Noni Madueke siamsak tha tak chu awlsam takin a pet goal a, hmahruaina goal a thun nghal. Hma takah goal thun bawk mah se England hian goal an thun belh thei lo rei hle thung. Greece pawhin an mualah hnehna chan tum viau mah se si nghak Jordan Pickford an paltlang thei lo.
Goal thun tumna an innawr tawn fe hnuin hun tawp dawn hnaih lamah England an che fuh leh ta nge nge. Minute 77-naah Greece player Odisseas Vlachodimos chuan an lamah a ti-goal palah hlauh a, England goal hnihna a thunsak. An hmahruaina an tihzau hnuin Three Lions hi inrintawkna sang zawk nen an inlan chhunzawm a, goal pawh an thun belh leh. Minute 83-naah Curtis Jones chuan an goal thumna thunin an chakna a nemnghet zui ta a ni.
England tan Greece leh Republic of Ireland hmachhawn tura thlan player engemaw zatte an inhnukdawk a. Inhnukdawk an tam em angin captain Harry Kane chuan khawvel hriatah a lungawi loh thu a sawichhuak hial nghe nghe. An chunga awm mek Greece lakah an that dan ang berin inlan thei lo mah se England hian 3-0 ngawtin hnehna an chang ta tho thung.
Group 2-a inkhel dangah Republic of Irealand chuan an mikhual Finland chu minute 45-naa Evan Ferguson goal thun hmangin an hneh.
Group 2-ah hian khelh nga atangin England leh Greece ten point 12 an hmu dun mek a. Head to head a tha zawk England chu group hmahruaitu an ni. Englang hian Pathianni zan hian Wembley Stadium-ah Republic of Ireland an hmachhawn zui leh dawn a. An mualah an chak a nih chuan inelna sang ber League A lamah an kir leh ang. An mualah an chak zo lova, Finland lakah Greece an chak si a nih chuan football ram ropui England hi League B lamah an cham chhunzawm thung ang.
Hmahruaitu thar England
