Pathianni zana English Premier League (EPL) khelhah Liverpool chuan an mikhual Brighton an hneh. Liverpool an chak laiin hmahruaitu Arsenal chu Manchester City lakah an chak zo lova, EPL hmahruaitu thar chu Liverpool an ni.
Liverpool in Brighton an lehthal
Table chung ber luah let thei tura chak mamawh Liverpool hian Anfield-ah pakuanaa awm mek Brighton an mikhual. Reds hian an mualah bul an tan chhe viau a, inkhel tan atanga minute thum chhung lekin goal an chhuah nghal. Hma taka goal an chhuah hi Mohamed Salah leh Luis Diaz te goal thun hmangin an hneh let a, an mualah point thum hlu tak an hmu.
Anfield a lenglut Brighton hian pahnihnaa awm mek Liverpool lakah rin phak baka thain bul an tan. Inkhel tan atanga secpnd 87-na lekah Brighton striker Danny Welbeck chuan top corner-ah pui zetin a pet goal a, hmahruaina goal a thun. He goal hian Brighton a fuih phur viau a, Anfield-ah ngei point hmuh tumin tan an khawh zui nasa zui hle. Hma takah goal thun mah se an goal an humhim rei thei bik lova, goal an chhuah ve thuai.
Chak mamawhna sang taka nena inlan Liverpool hian goal thun ngei tumin thapui an thawh a, an mikhualte an nawr na hle. Ball chang tam zawk leh hlauhawm zawk an ni chho char char a, minute 21-naah an si phurh an sut ta nge nge. Colombia forward Luis Díaz chuan hnai tak atanga pet goal in an si phurh a sut. Diaz goal thun hnuin Jurgen Klopp-a team te an khel tha zui viau a. An manager thar ni thur thei Roberto De Zerbi enkawl Brighton lakah hlauhawm siam fo mah se goal thun belh turin an hun eng emaw chen an nghah a ngai thung. Inkhel hmuhnawm takah hian chawlhlawk hmain goal dang a luh belh thei lova, 1-1 a inhnehtawk chungin chawlhlawk an hmang.
Chawlhlawk hnu lamah Liverpool an khel tha chhunzawm viau a, goal pawh an thun ta nge nge. Minute 65-naah Mohamed Salah chuan midfielder Mac Allister siamsak atangin goal pawimawh tak, hma an hruai letna goal a thun. Salah goal thun hnuin inkhel a hmuhnawm zui viau a, Brighton in an si phurh an sut teuh hle. Lewis Dunk chuan hnaite atangin chance tha zet mai a nei a, rang taka a tauh tha tak chu Reds si nghak Caoimhin Kelleher chuan tha zetin a lo dang hlauh a, an team a chhanhim. Thlamuang thei diaiin hun tawp nghak thleng bik lo mah se Liverpool hian an hmahruaina an humhim thei hram a, hnehna pawimawh tak an chang zui ta a ni.
Brighton laka Liverpool chakna goal thuntu Mohamed Salah khan Liverpool tan EPL-ah goal 155 a thun tling chiah a, EPL a goal thun hnem 10-na a ni mek a. A chung chiaha awm Jermain Defoe chu goal 7 in a phak lo mek. Salah hi season kal meka inelna hrang hranga goal 34-ah a inrawlh tling a, EPL player zingah goal a inrawlh tam awmchhun chu goal 35 a inrawlh Erling Haaland chiah a ni. EPL-ah Liverpool an champion a nih chuan Aigupta tlangval Salah hian mimal chawimawina sang a dawn theih ngei a beiseiawm.
An muala chak Liverpool hian khelh 29 atangin point 67 an hmu a, EPL table chung ber an luah nawn leh. An hnuai chiaha awm Arsenal nen an inkarah point hnih a tla zep mek. Khelh hmabak pakua an la neihah an chak vek a nih chuan Liverpool hi champion thar an ni dawn a. Season tawp ruala chhuak tur manager Jurgen Klopp thlah nan EPL ah champion an tumruh hle.
Champion tuma inel mek club pathum; Liverpool, Arsenal leh Manchester City te zingah Liverpool hian champion theihna hun an nei tha bera ngaih a ni a. An champion theihna chance hi 48% vel zet niin football chik mite chuan an chhut. Khelh hmabak khelh kua an la neihah Manchester United leh Tottenham an hmachhawn a ngai dawn a. United leh Tottenham hi an kawng daltu lian an ni thei dawn. Reds hi Pathianni zan khian Old Trafford ah an leng lut dawn a. An hmelma lian United mualah ngei an chak a nih ngat chuan an tan champion a hnai sauh dawn a. United lakah an tlawm a nih erawh chuan an tan champion a harsa sauh thun ang. Palina nih tum United hian an hmelma lian Liverpool hi hneh ngei an tum dawn a. Old Trafford-ah inkhel hmuhnawm en tur a awm dawn.
Hmahruaitu thar Liverpool
![](https://theaizawlpost.org/wp-content/uploads/Clipboard01-468.jpg)