Daily Newspaper

HMAIKAWR PHENA HMEL

50

-Vidpuia Hrahsel

Hmaituamna tel lo chuan nun a kim lo tlat tawh a, a tulna avangin kan thuam chi khat atan kan hmang chu a nih ber tawh hi maw. Taksa hliahkhuh nan a thuamhnaw inbel hi chu kan pianken a ni a, kum 2020 inher chhuakin a rawn ken, mitin tan hrileng avanga hmui leh ka tuam that a tulzia kan hre hne hlei hlui a. Tu amah hian kan vuah reng thei lova, mahse invenna atana a pawimawh em avangin kan vuah lui mai zawk. Tunah erawh khawi lo chhuah dawnin ken ngei ngei a ngai a, theihnghilh thiang lo a ni tawp. Hmaituamna chungchang bik ngawr ngawr thai lan tum ka ni lova, hmaikawr phena thil awm, lang lova lang reng si, mihring nun tak tak, thuruk theih loh lam hawiin aw niang.

Zirtawpni tlai a ni a, zawlkhawpui thlang lam atangin zawlkhawpui chhuah lam panin, vantlang lirtheiah ka chuang chho va, lirthei veivak inhnawh tam lutuk avangin kan chuanna lirthei pawh chuan hma lam pan zai a rel sawt mawh khawp mai. Ka chuanna lirthei tukverha dak chung chuan, kawtthlera mipui veivak ka thlir a, mitin chu nidanga ka hmuh ngailoh ang vekin, an hmai an lo tuam ta sup sup mai hi a lo ni a, mi nawlpuiin hmaituamna an vuah chu thlir satliah mai ka ni lo, ka rilru a kai peng dawrh a, a kal kual a kal kual a, ka thlir zel a, mi chi hrang hrang mize inang lo tak tak an ni awm si a, an zavai mai chuan an hmaikawr phena an nun chu ka suangtuah a, ka hmuh hnuhnun apiang ka rilruin a um zui a.

Tichuan, vantlang lirtheia ka chuan chhung chuan hmaikawr phena mihring hmel chu tihian ka suangtuah ta a – Mihring ze dik tak pholanna hi kan thiltihah te, kan nun danah te, midang kan en danah te, mi hrang hrang bula kan rilru put dan atang te hian a lang chiang awm mang e. Hmaikawr kan vuah vek avangin kan nun chu hliahkhuhin a awm a, thil reng reng mi hmuh a lang lo tura kan tih duh chhung chuan, milem leh mi dawih, mahni in ringtawkna nun nei lo kan ni. A phena thil hliahkhuh leh a ruka thiltih hian nun chhungril a teh pha lova, pawnlam lan danah chuan mawiin langsar ringawt mah ila, chhungril nun laktlak loh, a dera nung mai kan ni awm si a. Mihring lang tlang tak, a dera nung ve lo, zep ruk nei lo leh a nun dan pawm thiam mi nun chu awhawm tak a ni. Lansarh tum luat a, khawsak ze mil lova nun te, lar duh avanga pawnlam mawina chauh ngaih pawimawh te hian mihring nun a ti bahlah fo va, hmaikawr phenah a derin kan nung a, a tak taka nun laktlak leh lang tlang nih kan tum chuang si lo. Heti hian a derin kan nung hova, pawnlam landan avangin kan inpawm zam vel mai mai chu a ni sia maw. Mitin mai chu hmaikawr vuah chungin kan leng a, kan nun chawhpawlh tak chu hliahkhuhin a awm a, a phenah pawnlang mawinain kan nung a, lungawi hmel pu siin chhungrilah lungngaihna a inzem a, hlim hmel pu lui chungin chhungrilah kan na a, kan hmaikawr avangin a phenah nun lem takin khawvel lem kan chang a.

Misual rukru ten an hmel hliahkhuh nan an hmai an tuam thin a, lang lo tura thuhruk hrim hrim hian sual lam a kawk nghal a, rukruk avanga hmaituam an man a, tunah chuan hrileng avanga invenna hmaituamna vuah lo pawh man theih an ni ta. He hmaikawr phenah hian mihring mize tak tak chu lang lo tura thuhrukin a awm a, pawnlam landan ringawt chuan chu mihring chu a teh kim lo. Chu hmaituamna phenah chuan mihring nun chu a lemin a nung thin. Hmaikawr phenah chuan itsikna, awhna, sualna a in phum ru teuh si a, pholan lovin kan pai theuh si. Hliahkhuhna hnuaiah chuan nun lem kan thukru a, nun tak kan phochhuak ngam lo. Lang tlang nun nei apiang an hlim a, a eng zawngin khawvel an hmachhawn a, mahni nihna pawm apiang an lungawi a, mahni nihna pawh hre lo khawpa a dera nung apiang an nun a nguai thin.

Hmaikawr phenah hian nun lem tak hmangin kan nung a, kan chhungril tak laktlak loh, pawn lam lan dan chauh mawi, mahni inpawm thiam lo apiang hian nun zahawm leh awhawm an nei ngai lo. A derin kan hlim a, a derin kan tap a, nun tak tak nei turin a sual a sual chhuah a, in siamthat tumna nun kan tlachham thin. He hmaikawr phena kan nun theuh hi, pho chhuah theihin awm ta se, darthlalang ang mai hian tumah hian kan duh ka ring lo. Kan nun lem tak, midang itsikna, midang ngaih theih lohna, thleibikna te hian kan nun a ti chau fo va, hneha hnekin kan pal zam mai thin. He kan nun hmaikawr theuh hi, phelh a siamtha turin keimahni theuh hi kan pawimawh a, chhungrila insiamtha turin leh tlawm a ngaih huna tlawm thiam a, a dera kan nun dan theuh hi pawm thiam a, insiam that theuh i tum ang u.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy