Dr. C. Lalrampana
A KAMKÊUNA
Manipur hi India hmarchhak biala awm, hnam hrang hrang awmna state a ni. Kum 2011 chhiarpuia a lan danin mihring nuai 28.55 (28, 55,794) zet an ni a, square kilometer 22,327-a zau a ni. Tunah chuan mihring nuai 36.49 an tling tawh. Heng zinga 58.9%-te chu phaizawla cheng an ni a. Zaa 41.1% chu tlangrama cheng an ni. Meitei bik hi 53% an ni a, Naga 20% leh Kuki-Zo 16% an ni. Tlangram hi tribal-te chenna a ni ber a, tribal zawng zawng hi mi 11, 67,422 an ni. Chung zingah chuan hnama pawm 33 zet Manipur-ah hian an awm a, chungte chu Naga leh Kuki hnuaiah an awm a, Manipura tlangmi hnam hrang hrangte khaikhawmtu hlâwm pahnih an ni. Hnam pahnihte hi an tawng hrang, incheina, an nunphung leh an hnam dan hrang hrang atangin an hriat hran theih a ni. Manipurah hian hnam hrang (ethnic group) 33 lai an awm naa, hnam chihrang hranga inpumkhatna (unity in diversity) tih hmel lanna State pawimawh tanileh hlawhtling tak a ni thin.
MANIPUR HNAM CHIHRANGTE CHU?
Manipura hnam tam ber phaizawl bawhchina awmte chu Meitei an ni a, 53% an ni. A bak zawng 47%-te erawh tlangrama cheng tlangmi hnam hrang hrang leh hnamdangte an ni. Hnam hrang hrang 33 zet awm zingah a langsar zual deuh 10 tarlang ila:
Naga hi Mizote ang bawkin mi lu la hnam (head hunting history) leh warrior tradition nghet tak nei an ni a, Kuki-ho erawh chu Tibeto-Burman tawng hmang zinga sub-family an ni a, kum 1881 lai khan Manipur-ah 30,000-40,000 vel an lo awm hman tawh nia chhut a ni. Anniho hi Mizorama Mizo leh Myanmar-a Chin-te nen pawh kan inzawm nghet tlat a ni. Kum tam tak chhung Manipur-a hnam hriat hlawh tak takte chu Aimol, Anal, Chiru, Chohte, Gangte, Hmar inpui, Kharam, Khoibu, Koirao, Kom, Lamkang, Liangmai, Mao, Maram, Maring, Mate, Monsang, Moyon-te an ni , Paite, Poumai, Purum, Ralte, Rongmei (Kabui), Simte, Sukte, Tangkhul, Tarao, Thadou, Thangal, Vaiphei, Zeme leh Zou-te an ni. Heng hnam chihrang hrangte hian a tlangpuiin anmahni tawng hmanga inbiakpawhna an nei vek a, hnam hrang hrang inkara inbiakpawh nana tawng tualleng ber erawh chu Manipur-a official language Meitei tawng hman a ni thung. An zingah hian socio-political leh linguistic hrang hrang awm mah se, an vai hian Mongoloid group atanga lo piang an ni a, culture leh traditional domain-ah pawh inanna an nei vek a ni. Manipur-a cheng hnam zawng zawngte hian buhfai an ei ber a, sa, sangha leh thlai (seasonal vegetables)-te chu an duh ber a ni. Manipur-a scheduled tribe-te chu a hnuaia mi ang hi an ni.
1) Aimol: Aimol hi Assam leh Manipur-a cheng hmuh chhuah Kuki hnam hnuaia awm an ni a. Aimol tawng an hmang a, Kuki-Chin-Mizo tawng hnuaia dah an ni. Chandel district, Senapati district leh Bishnupur district-a Loktak dil chhehvela hmun thenkhatah an awm a ni. Tlangram lo neih chu eizawn nan an hmang a, Kristian an ni ber.
2) Anal: Anal hnam hi Tengnoupal district-a chhim lam tlangrama cheng hnam upa pawl an ni. Kum 1951 khan hnam anga pawm an ni a, a hmain Kuki hnam upa ber zinga mi anga pawm an ni a, tunlah hian Naga hnam anga pawm an ni.
3) Chiru: Chiru-te hi Manipur leh Assam-a cheng hmasa berte zinga mi an ni. Kum 1956 khan Scheduled Tribe anga pawm an ni a, state chhunga district pali, Tamenglong, Kangpokpi, Churachandpur leh Thoubal district-ahte an awm a ni. Kuki-Chin-Naga tawng zinga pakhat Chiru tawng an hmang a ni.
4) Chohte: Chandel leh Bishnupur district-a awm an ni a, Kuki-Chin tawng an hmang. An eizawnna ber chu lo neih, ran vulh, thir siam leh puan tah a ni. Hnam sarihah an inthen bawk.
5) Gangte: Churachandpur, Tamenglong leh Senapati district-a cheng, Chin hnamte an ni a; Kristianna chu an sakhaw pawimawhþè ber a nih avangin. Khawvel pumah mihring 40,000 vel an awm a, kum 2018 thleng khan Gangte-te hi zirnaah an sangin an changkang hle a, 99% literacy rate an nei bawk.
6) Hmar: Churachandpur district-a awm tam ber Kuki-Chin-Mizo group-a mi an ni. Agriculture leh puan tah hi an eizawnna ber a ni. Kum 1910 atang khan Kristian sakhua an pawm a, Hmar hian an khua inrelbawlna chu Lal (Chief), Khawnbawlupa rawngbawltute an nei a ni.
7) Kharam: Senapati district-a khaw 7-ah an awm a, chung zingah chuan Kharam Pallen khua hi an chen tamna ber a ni. Kum 2003 khan scheduled tribe anga pawm an ni a, a tam zawk chu Kristian an ni.
8) Khoibu: Khoibu hi Manipur-a Naga hnam zinga mi a ni. Khoibu tawng an hmang a, ‘Uipo’ an ti bawk. KhoibuKhullen hi Chandel district-a Khoibu-te chenna khua upa ber leh hmasa ber a ni. Kum 1949 khan Manipur-a Scheduled Tribe-a pawm an ni.
9) Koirao: ‘Thangals’ tia koh an ni bawk, Senapati district-ah an khawsa tam ber. An tangrual hle a, tlangramah an cheng a, a tam zawk chu National Highway No. 2-ah an awm a, Thangal-ho hian a tlangpuiin incheina eng leh rawng hrang hrang an uar hle a ni.
10) Kom: Kom hi Churachandpur, Tengnoupal leh Senapati district-ahte an awm a. Koireng, Aimol leh Chiru tawng ang deuh leh Hmar tawng nena inkungkaih tak tak an hmang thin. Kristian an tam deuh ber a ni. Kom festival lian thenkhat chu Seling, Hlungphun, Belam leh Lamkut-te an ni.
MANIPUR BUAI CHHAN
Manipur hian Chief Minister 12 lai a nei tawh. Tuna CM Nongthombam Biren Singh hi March 15, 2017 atang khan Manipur state BJP ministry-a CM niin CM 12-na a ni mek. CM kal ta 11-te hun chhung zawng khan hetianga chi leh chi inkara buaina nasa ang hi a la chhuak ngai lo. Chi leh chi inkara buaina tenau neuh neuh erawh a chhuak ve fo. Mahse, tun anga buaina lian hi chu Biren Singh CM-na hnuaiah chiah a la thleng a ni. Hetianga buaina a chhuah chhan ber nia lang chu kum 10 chhung zet sawrkar laipui hnena Meiteihovin ST status neih ve an phut hnuah, an hlawhtling thei lova. Manipur state hnenah ngen nawn lehin Meiteiho chu ST status pek theih turin Manipur High Court chuan thutlukna a siam ta a. He High Court thupek dodalna avang hian May 3 khan tlangram district-a tribal pawl hrang hrangte chuan nawrhna huaihawtin kawng zawh runpui (solidarity march) an huaihawt a. Hnam leh hnam; chi leh chi inkara buaina namen lo a chhuak ta a, hei hian state chu buaina thuk zawkah a hnuk lut ta a ni. Manipur High Court-in state chhung phaizawla cheng Meiteiho ST status pek an phut chungchanga thupek a siamah hian kum 2013 atang khan khawtlang mipuiin ngenna tam tak an thehlut tawh chung pawhin sorkarin hma a la lo tih a tarlang a, he thupek avang hian Manipur-a tlang mi tribal pawl hrang hrangte chu na takin a nghawng a. May 3, 2023 atang khan hnam leh hnam inkara buaina nasa tak chu a lo intan ta a, hei hian state chu harsatna thuk takah a hnuk lut ta a ni. Manipur-a mipui tam zawk, Vaishnava Meitei community-te tana Scheduled Tribe dinhmun dilna hi Inner Line Permit (ILP)-state chhunga pawn lam mi luh khap tura phutna nen a kal kawp a, hei hi kum 1980-a Parliament-in a lo pawm daih tawh kha a ni. Tin, hei bakah hian Hnam/chi inthliarna kalpuiho chuan CM hi an thuhnehin an hruai sual (misguide) niin a lang a, zohnahthlak zawng zawngte chenna huam chhung chu Forest Reserve Area-ah rinluh luihsakin vau an nih bakah Zohnahthlak tlangmi Kuki-te chu Manipura cheng nghet ni lovin, Burma atanga pem khawm ruihlo zuara sumdawng leh cocaine cultivation hmanga ei zawng, misual vakvel mai mai angin Sawrkar laipuiah thlenin chu chu CM Biren singh pawh hian tan chhan berah neiin Manipur atanga hel pawl (terrorist) hnawh chhuah tur niin a puh chamchi bawk thin.
Manipur tualchhung buaina hi chi leh chi inkar thil a nih avangin a nghawng a na hle a. Sipai chakna leh sum leh pai emaw, politic zawng emaw pawhin chinfel mai theih a ni lo. Buai tirh atanga chhutin thla 18 zet a ral ta. India sawrkar laipui meuh pawhin sipai engmawzat dah lut mah se, mipui thinlung hneh tawn hmasak a ngaih avangin engmah awmzia a nei lo. He buaina vang hian mihring nunna 221 vel zetin a tuar tawh a; kristian biak in phei chu 249 zet suamsama halral a nih tawh bakah chenna in leh Missions quarters engemaw zat a chhe tawh bawk, sawi vek sen a ni lo. Buaina chawk chhuaktu ber nia ngaih theih CM Biren Singh ngei pawh a mangang ru tawh hle niin a lang. Ama mimal in leh a ministers, MLA-te in leh bungrua thlengin a tuar ve tan ta mek bawk nen. Buaina siam hi a awl hle a, chinfelleh erawh a harsa hle. Chuvangin Sawrkar laipui pawhin Manipur buai mekna hi engtia chin fel chi nge tih a hrethiam mai bik lo ni berin a lang.
A TLANGKAWMNA
Nikum kum tir February, 2023 Manipura buaina chhuah hma lawk khan Manipur-ah hian ka zin a, khatih lai pawh khan Manipur Forest Department hmalakna thawm mipui titileng vak ka hriat dan chuan tlangmi (tribal)-te chenna huam chhung zawng zawng hi forest reserved area a ni a, an rawn teh that hunah chuan kan chhuah vek a la ngai dawn niin Biren Singh-a sorkar hian hma a la mek tih thawm ka hre tawh. A hnu lawk, May 3, 2023 a lo thlen meuh chuan an ruahhman rukna leh tlang mite phiarrukna (a great conspiracy) chu a takin a lo lang chhuak ta a. Manipur state nuam tak, hnam chihrang hrang 33 chuang teh meuh inngeih dial diala hlim taka chengho thinte chu an inchemhar tan ta a, chengrang uak ri tuar tuar nen, mihring nunna tam tak, bungrua tam tak, zirlai tam takin an tuar a, mi tam tak mahni in leh lo chan leh chhawmdawlna chhawlbuk hulhliap belin hlauthawng reng renga thaw dep depin an nunkhua damchhung an hmang ta mek a ni. Manipur leh abikin Burma-te hi phaizawl nuam tak a ni a; hetianga buaina awm lo, ram ralmuang tak ni se’ng chuan inhmun leia pem ve hial pawh ka chak a, hma ka lak ruk mek laiin buaina a lo thleng ta phut mai hi a rapthlakin a van pawi tehlul em! Inngeih dial diala awm a, ralmuang taka awm hi a hlut tehlul nen. Abikin Manipur-ah phei hi chuan hmana Manipur ang kha engtikah mah a awm leh thei tawh dawn em ni? tih hi dawn vawng vawng tham a ni. Zalen tak leh inngeih dial diala awm hlutzia hi Zoram mipuite hian kan hriat tharleh a van tha tehlul em! Tuna zoram zalenna leh ralmuanna hlu tak, van Pathianin min pekte hi a va’n ropuiin a va’n hlu tak em! Lawm nachang kan hria em le? Buaina chawk chhuak zawng, communal feeling awm thei zawnga hmalak chingte hi theihtawp chhuaha kan do ngam a ngai a ni. Kan zalenna hlu tak hi kan hman thiam loh vaih chuan tuna Manipur dinhmun ang aia rapthlak zawk leh chhe zawk pawh hi kan la hmachhawn thei a ni. Chuvangin, kan sawrkar, mipui sawrkar pawh hian kan inlungrualna leh kan zalenna tichhe thei zawnga hmalak chingte hi chu tupawh ni fahmiang, dimna nei miah lovin an chungah kuthhlakin zilhau hmiah hmiah zel se a lawmawwm ngawt ang. Aw! Zoram, chak tak leh huai takin awm phawt mai rawh; I chhungah zofa zaleng zawngte hlim tak leh ralmuang takin kan leng dial dial e.
HMANA MANIPUR KHA AW!!!
