Daily Newspaper

HMANGAIHNA HLA

318

-Lal Dena

(Vawiin hi Pu Vankhama piancham kum 115-na a lo ni leh der tawh a, a hriatrengna’n Hyderabad Mizo Annual magazine-ah ka thusep kum 20 vel kal taa ka ziah ka rawn thawn thar leh a ni e.)

Mizo hla phuah thiamte thutna tlar hmasaa thu tur mi pathum min thlantir se, ka thlante zinga tel ngei ngei tur chu Vankhama a ni. Anni hun lai khan Sap hla thlûk hmanga lengzem hla phuah an ching a. Lalzova hla tam tak pawh Sap hla thluk hmanga phuah a ni. Vankhama pawhin ZAWLKHAWHERMAWII (Irish Air); AWMKHAWHAR LENKAWL KA HAN THLIR A (Aloha Oe), AW! MAHRIAKA TUANNA KHUA HEI ANG ZAU’AN (Prisoner Song), MAHTEN KAWLKUNGA TLAITLA KA THLIR (When the moon comes over the mountain) leh a dang dang a phuah a. Ama siam thluk ngei hmangin hla sawmnga aia tam a phuah bawk a; tam tak chu ram buai lai khan a riral zova, a pawi khawp mai.

Vankhama hla phuah te zinga ka rilru khawihtu ber chu ‘HMANGAIHNA’ tih hla hi a ni. He hla hi Indopui pahnihnain kan khawvel a tuam mek lai, kum 1944-a a phuah a ni. He hlaah hian Vankhama’n hmangaihna a hmuh dan leh pawm dan chiang takin a tar lang a. Hetiang hian, pehhêl miah lovin hmangaihna chu a luh chilh tawp mai a ni:

Thuhriltu’n hmanah hmangaihna thu a hrilh chuan,
Hmangaihna baka ropui leichhinah awm lo;
Inhmangaih theuh r’u, ka lenrual duh te u,
Hmangaihin infak, uanthuan rêng a rêl lo;
Hlemhlêt leh itsik, dawt thu a
mausam e,
Kei ka thu leh hla ngei kha a lo ni.

Thuhriltu a tih hi kan hre theuh awm e.
I- Korinth bung 13: 4-7-ah chuan Tirhkoh Pawla’n “Hmangaihnain a dawhthei a, ngil a nei bawk thin; hmangaihnain a itsik lo va, a infak lo va, a uang lo va, mawi lo takin a che lo va, mahni hma a sial ngai hek lo; a thinur duh lo va, thil sual a hre reng ngai hek lo: hmangaihna chu thil dik lovah a lawm lo va, thutak erawh chu a hlimpui thin. Engkim a tuar hrâm hràm a, rinnain a khat a, a beisei tlat a, engkim a tuar chhuak thin” tiin a lo sawi kha. Tirhkoh Pawla rilru tawmpuiin Vankhama pawhin hmangaihna chu khawvela thil ropui berah a ngai a. Chu hmangaihna chu mipa leh hmeichhia inkarah chauh ni lovin, a thenrual zawng zawngte chungah pawh awm se a duh a ni. Pu Darchuailo Renthlei chuan “Vankhama Hla Te (A Critical Study) tih a buatsaih a (1992). Chutah chuan, “Vankhama hian a hmangaihna thlir dan hi mi tin ten tawmpui thei se a duh êm êm a ni. He a zirtir ang thlap hian nungin hmang thei theuh ila chuan khawvel hi a nuam sawtin, Bible-a rulmuk tawmkuk kotlanga naupangte tualchai a, rulrial kaw kotlanga an len hun te, sakeibaknei leh bawng note tlatza hun tur a sawi te hi a thleng nghal maiin a rinawm rum rum mai; khawvela remna leh muanna kan tih kan tih te pawh hi zawn ngai lo vin kan nei nghal mai dawn a ni” (p.158) tiin.

Vankhama pawm dan chuan hmangaihna chu chin lem nei lova hmangaihnaa khat, inngaitlawm, chapo lo, itsik ngai lo, hlemhlet leh dawt thu duh ngai lo chu a ni. Hetiang hmangaihna tak tak hi engmahin a dang zo lo va, khawi hmun pawh a thleng thei a ni. Chutiang hmangaihna chuan mihring hmel leh pawnlam mawina a en lo va, thutak leh thianghlimna a zawng zawk thin. Chutiang hmangaihna neitu chuan hmangaih let ve a phut ngai lo. He hla hi a ropui êm avangin kei chuan lengzem hlaah ringawt khung chi niin ka ngai lo. Hetiang hmangaihna hian nupa, kohhran le khawtlang min phuar khawm se chuan, ‘Hmangaihna a lo dai zo ta, buaina leh lungngaihna a khat’ tih hlate hi kan khawvel atangin kan ûm bo daih tur! A hla thunawn hi han chhiar leh te:

I sakhmel tawn changin thinlai a êng a,
I sakhming an sêl leh kawl ang ka hnìm a;
A tha par tin kha bawihte, i tan ka ti,
Thei chang se i tan si-ar lak ka huam a;
Ka thâi chang mah lo la, khiangawi mi tawnah,
Hmangaih lung i dum phawt chuan lawm zel tang e.

Vankhama’n a hmangaihi hmel a hmuh chuan, a thinlung lawmin a khat a; a tan khawvel hi pangpar huanah a chang thin. Mahse miin a hmangaihi an rêl emaw sawi chhiat a hriat changin a rilru a na êm êm thin. A hmangaihi tan chun thil tha ber leh pangpar mawi ber a duh a, a tan engkim tih a huam a; ti thei chu ni se, vana arsi thleng a tan laksak a inhuam a ni. A tawi zawngin, a hmangahi tan chuan a nun hial pawh a hlan ngam a ni.

Vankhama hmangaihna danglam bikna chu hei hi a ni: A hmangaih khan tâng dang pawmin, a hmel mawina leh duhawmna zawng zawng pawh, mi dangin pawm chul vek pawh ni se, a pasal hmangaih leh duhsak hlawh a, a tana nuam zawk leh hlimawm zawk a nih phawt chuan a lawmpui thei zelna hi a nih. Chu chu îtsîkna tel lo hmangaihna chu a ni. A va han ropui em. Mi dang chuan, ‘Leng dang chu sirah hnawl la’ kan ti duh vek a ni.

Hringnunah hian tu pawhin hmangaihi te, hmangaiha te kan nei theuh awm e. Kan hmangaih ten min hmangaih let ve theih nan, engkim ui nei lo vin an tana tha tura kan hriat apiang tih kan hreh ngai lo. |awngkam tha leh thlum, Lal Solomona khabe thleng kan hawh chang a awm thin. Mahse, kan hmangaihi te kha kan hmangaih veleh, neitu nihna kan hauh nghal a, neitu nihna kan hauh veleh mahni hmasialna leh itsikna kan nei nghal a, kan thîkthu a chhe hlur nghal bawk thin. Hmangaihna tak takah erawh mahni hmasialna leh itsikna ten hmun an chang lo. Mi tam tak chuan an ngaihzawngte an nei theih dawn loh chuan, tih hmingchhiat pawh pawi an ti lo va, tihhmingchhiat tuma hehpeta tang pawh an awm thin. Hetiang hmangaihna hi phûtlêt hmangaihna a ni a, a petu leh a dawngtu tan pawh a hahthlak thin.

Hman kum lawka Bangalore-a thil thleng kha ka ngaihtuahnaah a lo lang a. Kolkata nula Chatterjee chu Bangalore Call Centre-a a thawhpui tlangvalin a ngaizawng a. A nulain neih a duh si loh avangin car-a an tlan laiin a dulah tlangval chuan vawi sawmthum aia tam a vit a, highway kawng sirah a ruang a paih a. Chu chu eng ang hmangaihna nge ni ta ang le? Kan khawtlangah ngei pawh hetiang tih duh hi an tam mai.

Vankhama erawh chuan a ngaihzawng kha nei thei lo pawh ni dawn se, a ngaihzawng lungawina leh hlimna kha a lungawina leh hlimna a ni thei tlat mai. A ngaizawng khan vanduaina tawk se, a tuarpui dawn a, mi nupui ni tawh mahse tanpui a ngaihna apiangah tanpui a duh zel ang. Chu chu hmangaihna dik, engkim tuar hrâm hrâm thei leh engkim tuar chhuak thei, Vankhama hmangaihna chu a ni. Hei hi mi dangte tana nun pek phalna hial, phutlet awm lo hmangaihna chu a ni. He hmangaihna hi mi tinin nei thei se a duh avangin hlain ropui takin a lo puahpui a ni. Hei hi Isua Krista zuitute pawhin kan thupui tur ber a ni lawm ni? Engkim chan vek hnu leh thil zawng zawng ral vek hnu pawha la awm reng tur Tirhkoh Pawla’n a sawi pawh kha a ni lawm ni?

A hla chang hnihna leh tawp ber hi han chhiar leh teh:

Tha tanâ chu tlei dang pawh i lêng zunah,
Lam sûl ang an hawi ma bil lo’ng tih rawh, mampui:
Chhaka vul mawi senhri par a iang rêng kha,
Kan hêl kan hêl ang che vangkhaw mawi leng hi;
Hai ang tar khuareia lenlai hril changa,
“Lung tum loh leng vuaia te” i tih rengan.

Vankhama ngaihzawng chu a hmel a tha a. Hmeltha na nâ nâ chu val dang tam tak pawh a zunah an uai a, a lam hawiin sul ang an thle thup tih a hria a. Chutiang hmeltha, chhak zoa senhri par anga mawi leh vangkhaw mawitu chu tlangval rualin an rìm huai huai chu thil awm dan tur a ni tih a hre bawk a. Chu a hmangaihi chu a nei thei lo a nih pawhin, a tar hnuah a vanglai chanchin a sawi changa, “Ka duh lo val rual te kha” a tih tur zingah tal a tel ve chuan a lung a awi turzia thu a sawi a ni. Vankhama hmangaihna chuan tlawm luat a dawn lo.

He Hmangaihna hla hi lengzem hla a nih laiin, hmangaihna dik tak Bible ami denchhena phuah a nih avangin, lengzem hla tia hnualsuat tur chuan kei chuan ka ngai lo. Chanchintha hla (gospel song) te hi ‘dairek’ (direct)-a Pathian fakna an ni a; lengzem hla te hi ‘indaireka’ Pathian fakna hla an ni bawk. Pathian thilsiam zinga chungnung ber leh mawi ber mihringte hmangaih leh fak hi Pathian fak leh chawimawi kan ni tih i hai suh ang u.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy