India hmarchhak state ho tih hmasawnna atan DoNER ministry leh North Eastern Council tih chak deuh deuh a tul tih Mizoram chief minister Lalduhoma chuan a sawi.
Aizawla nghah ni hnih awh 21st Commonwealth Parliamentary Association India Region Zone-III kharna inkhawm Inrinnia neihah Lalduhoma chuan, ni hnih chhung inpawh taka hmarchhak hmasawnna tur an sawihona chuan hmarchhak state-te inkarah inunauna, inhriattawnna thuk zawk leh thawhhona tha zawk a thlen dawn tih a sawi a. Mizoramin rambuai a tawh avangin hmasawnna hna thawh kawngah tlai bik mahse, state dangte um reng renga awm erawh an tum loa, kum 2047-a ‘developed country’ a India ram hlankai tumna kal zelah nasa taka beitu an nih zia pawh an Sustainable Development Goals (SDGs) index atangin a hmuh theih tih a sawi.
“Kum 2023- 2024 SDG index, NITI Aayog-in a tihchhuahah khan Mizoram chuan 72 kan score-a, India rama a titha pawl kan ni. Hmabak kan la neihte kan bawhzui zung zung theih nan sawrkar laipui tanpuina tam zawk kan mamawh hle. Mizoram chauh niloin, hmarchhak state zawng zawngin kan mamawh a ni,” a ti.
Hmarchhak bial hmasawnna tura tha thawhtu pawimawh chu DoNER leh NEC an ni, tiin, “An ni hi tih chak deuh deuh a tul. Nimahse, an ni pahnih hmalakna hi inbawhthuah leh inhne rual lo a awm thin a. Hei hian harsatna a siam thin tih kan hre theuh. Kan sawiho ang khan, DoNER leh NEC hi chhunfin (merge) an nih chuan chak lehzualin hmarchhak bialten kan mamawh min phuhruk thei zawkin a rinawm,” Lalduhoma hian a ti.
Bana Kaih Policy hmanga Viksit Bharat 2047 tihlawhtling tura hma lak an tum dan chief minister hian a sawi a. He scheme a hlawhtlin theih nan hian DoNER leh NEC thawhpuina Mizoramin a mamawh tih sawiin, NEC a lo changtlun lehzual theih nana rawtna a neihte a sawi bawk.
Hmarchhak hmasawnna atan DoNER leh NEC tih chak a tul – Lalduhoma
