Indian Railways chuan tangka kum tharah hian hmarchhak leh ram chhung hmun dang inkalpawh theihna turin lei hnuaiah relkawng km 40-a thui siam a tum.
Union budget pharh taka railways ministry tana sum dah chungchang sawi fiaha Nilainia thuthar lakhawmtute a kawmnaah Railways Minister Ashwini Vaishnaw chuan, “India ram chhung hmun dang leh hmarchhak inkalpawhna tur hian ruahmanna a bik taka siam a ni a. Lei hnuaia kawng pali kal turin km 40-a thui siamna tur ruahman a ni,” a ti.
Railways ministry hian budget pharh takah khan Assam leh hmarchhak state danga relkawng siam leh tihchangtlun nan Rs vaibelchhe 11,486 a ruahman a. “Tunah hian hmarchhakah hian Rs. vaibelchhe 72,468 senna rel kaihhnawih hna thawh mek a ni a, a ang siamna tur atan pawh survey neih mek a ni bawk,” tiin minister chuan a sawi.
Railway minister chuan, “Hna thawh mekte hi relkawng siamna, station tihchangtlunna, rel himna atana hmalakna a ni hlawm,” a ti.
India hmarchhakah hian rel hmanga intlawhpawhna hian nasa takin hma a sawn niin Vaishnaw chuan a sawi a. “Kum 2014 atang khan kawng km 1,900 vela thui siam tawh a ni a, hei ringawt pawh hi Sri Lanka ram puma relkawng awm zat aia thui a ni tawh a ni,” a ti.
Hmarchhakah hian Arunachal Pradesh, Meghalaya, Nagaland, Tripura leh Mizoramah railway sector chu eectricfication tih zawh vek a ni tawh a, Assam-ah 98% tih zawh tawh a ni bawk tih a sawi a. “Assam leh hmarchhakah hian relkawng km 2,839-a thui electric-a tih hna hi kum 2014 atanga thawh tan kha a ni,” a ti.
Railways ministry hian hmarchhakah hian Vande Bharat Express leh Vande Bharat Sleeper rel tlan inkawp khat ve ve a awm mek tih a sawi a. Amrit Bharat Express rel inkawp thum dang belh a ni tawh bawk tih a tar lang.
Hmarchhak kalpawh nan lei hnuaiah rel kawng km 40 siam dawn
