Hmarchhaka khuarel chhiatnaah mi 44 thi
Assam leh hmarchhak state danga tui lian chuan ziaawm lam pan hret mah se nunphung a la pangngai thei lo va, ruah sur nasa kaihhnawiha state pasariha thi chu mi 44 an tling tawh.
Prime Minister Narendra Modi-a chuan Thawhlehni khan Assam leh Sikkim chief minister ve ve bakah Manipur Governor Ajay Kumar Bhalla te biain tui lian dinhmunte a zawt a, puihna leh chhawmdawlna awm thei angte an sawi bawk.
Hmarchhak state hrang hranga thuneitute chuan May 29 atanga ruah sur leh tui lianah mi 44 an thi tawh tih sawiin heng zinga 17 hi Assam-ah an ni a. Arunachal Pradesh-ah mi 12, Meghalaya-ah mi paruk, Mizoramah mi panga, Tripura-ah mi pahnih leh Nagaland leh Manipur-ah mi pakhat ve ve an thi.
Sikkim tel lova state dang pasariha disaster management thuneitute chuan thite hi tuiin a lak, lei min, tui tling nasa kaihhnawiha thi leh thil dang chhiatnaa thite an ni hlawm tih an sawi.
Assam-a Assam State Disaster Management Authority (ASDMA) chuan district 21-a mihring nuai 6.33 chuang chu tui lian leh ruah hian a tibuai tih an sawi a. ASDMA hian khaw 1,506-a thlai chinna ram hectare 14,739 chuang tuiin a chim niin an sawi.
Assam-ah hian hmun hrang hrangah Brahmaputra leh lui dang paruk chu hlauhawm chin chhinchhiahna chung lamah an la luang bawk.
Arunachal Pradesh-ah district 26 awma 26-a khaw 156-a cheng mi 1,000 chuang tui lianin a tibuai mek a. An state-a disaster management thuneitute chuan Lower Subansiri district-ah chhiatna a thleng nasa ber nia sawiin in 170 vel a chhia.
He district-ah hian thil dang chhia pawh a tam a, kawngpui 50 chuang, power line 16, water supply line 25 leh sikul pahnih a chhe tel tih an sawi.
Itanagar Capital Region (ICR) leh Pakke Kessang-ah pawh chhiatna a thleng nual a. ICR chawmtu ber tui lakna pawh chhe zingah a tel a, Dariya Hill-ah kawngpui a chhe nasa hle bawk.
Manipur-ah chuan Imphal, Kongba leh Nambul luite chu hlauhawm chin chhinchhuahna chung lamah an luang hlawm a. Tui lian hi khaw 643-a mi 1,64,879-in tuarin chenna in 35,193 vel a chhia niin relief & disaster management chuan Thawhlehni khan a sawi.
Pathiannia Imphal East district-a tui lianin a lak mipa kum 55 mi chu Thawhlehni khan a ruang hmuh a ni a. Mi 3,917 chu hmun himah insawn chhuakin relief camp 77 hawn a ni a. A tuar na ber chu Imphal East, Senapati leh Imphal West district-te an ni.
Hetih lai hian phaizawla luang lui lian pathum – Imphal, Iril leh Nambul te chu Thawhlehni zan atang khan a kâm hret hret tan.
Hmarchhaka khuarel chhiatnaah mi 44 thi
