Daily Newspaper

Hmasawnna hna sawi tlak kan la nei lo – CM

8

Ram hmasawnna tura hnathawh chungchangah an sawrkar chuan mipuite hmaa chhuan tlak an la nei lo tih chief minister Zoram-thanga chuan a sawi.

Kumthar thuchah a sawinaah chief minister chuan MNF sawrkar chu 2019 kumtir atanga kal tan a ni ber tih sawiin, hna an thawk tan dawn chauh a, inthlan avangin election code of conduct-in a phuar a, June thla thlengin engmah ti tak tak thei loin inthlan lamah an buai a. Thla riat vel a kal hnuah 2020 March chhoah Covid vangin an vai buai leh ta tih a sawi. A tak taka an sawrkar hnuaia hma an lak theih chu 2019 July thla bawr atanga 2020 February thla tawp thleng awrh chauh a ni, tiin, “Chu pawh a chanve dawn hnai chu fur chhe lai a ni lehnghal a, chuvangin sawrkarnaah hian kan thil tih chhuan tur pakhatmah kan nei loa, a hrehawm kan ti. Amaherawh chu kan tih theih piahlam thil a ni a, Mizoram chauh ni loin India ram leh khawvel ram a ding thup a nih kha,” a ti.

Chuti chung chuan sawrkar laipui atangin a theih ang tawk tawk pawisa sanction an rawn pek hmangin a tih theih ang ang chu an ti nel nual a, duhthu erawh a sam lo hle tih chief minster hian a sawi. “Kan tih theih chin tawkah khan kan vaia kan lawm tlan thiam a ngai ta a nih hi,” a ti.

Tunah chuan khang zawng zawngte kha kalpelin kum 2021 kan chuankai tak thu leh Covid natna atanga indanna tur khawvelin a hmuhchhuah tan tak thu a sawi. “Chutiang a nih chuan 2021 ah chuan Covid pawhin min tibuai nep deuh tawh turah ngai ila, beiseina thar nen kan hmachhawpah Pathian-in India ram state zawng zawnga entawn tlak leh ti tha bera Mizoram min hlankai chhoh chhan hi, engemaw ah min hman a duh a, chumi min hmanna tur atan chuah Zoram leh a mipui hi min buatsaih a ni tih hre chungin he kumthar hi chuangkai ang u,” Zoramthanga hian a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy