India sawrkar chuan Asia chhimchhak nena insumdawn tawnna lian tak kalpui a tumnaah Mizoram chhim tawp, Lawngtlai district Hmawngbuchhuah thlengin rel kawng pawh tir a tum a. He ruahmanna hi engtia lo dawnsawn tur nge tih NGO Coordination Committee huaihawtin Zirtawpni khan Aizawlah inrawnkhawm a ni. NGOCC chairman Lalhmachhuana chuan, RTI dan hmanga zawhna Chief Minister’s Office-in a chhannaah, rel kawng kal zel turah sawrkarin mipui ngaihdan a la anga, mipui ngaihdan anga kal a ni ang, tih a ni a. Chuvangin mipui huapzau thei tur nia ngaiin an inkokhawm tih a sawi a. Sairang atanga Hmawngbuchhuah thleng rel kawng a kal chuan a tha leh tha lo zawng – environment leh economy lamah, inchimralna kawngah nghawng a neih theih avangin uluk taka ngaihtuahna sen tul an ti tih a sawi bawk.
NE Railways consultant Hrangtawna, IRTS (Rtd) chuan Sairang to Hmawngbuchhuah rel kawng siam dan tura ruahmanna leh hmalak tawh dan a sawifiah a. Tarlan danin, Sairang to Hmawngbuchhuah thleng rel kawng kal tur hian preliminary survey neih a ni tawh a, km. 223-a thui tur a ni. Lei 110 leh leiverh km. 98.63 a thui a awm dawn a, rel station 16 awm tura ruahman a ni. Tunah hian final survey nei turin ruahmanna a fel tawh a, preliminary survey nen erawh a danglam deuh thei tih sawi a ni.
Inrawnkhawmnaah hian NGO Coordination Committe-a tel Central YMA, MUP, MHIP, MZP leh MSU hruaitute bakah Central YMA CEC, sawrkar department zingah – Home, Police leh Land Revenue, Aizawl DC office, political party leh environment kaihhnawih pawl ding atangin Mizoram Environmental NGO Coordination Committee leh Centre for Environment & Social Justice, Mizoram Merchant Association leh mimal sawm bik, economist-te an tel a ni.
Sawihona atang hian NGOCC chuan ngaihdan a siam dawn a, pawl leh mimal rawn tur awmte a rawn anga, chumi hnu ah rel kawng chungchanga mipui ngaihdan chu Mizoram sawrkarah a thehlut dawn a ni.
Mizoramah Bairabi atanga Sairang thleng rel kawng siam mek a ni a. Sawrkar laipui chuan Sairang to Hmawngbuchhuah hi ruahmanna a siam leh tawh a ni.
Hmawngbuchhuah thleng rel kawng neih tul tih leh tih loh thu sawikhawm
