Daily Newspaper

Hmeichhe mawng lian lutuk tan hnute cancer risk a sang

127

Hnute cancer hi India-a hmeichhia ten cancer an neih nasat ber a ni a, hei vang hian zirchianna chi hrang hrang pawh an kalpui nasa hle. Tuna an thil hmuhchhuah tharah chuan hmeichhe mawng lian lutuk tan hnute cancer risk a sang tih hi a ni.

India-a cancer enkawlna hmunpui hriathlawh ber pawl Mumbai-a Tata Memorial Hospital a mithiam ten zirchianna an neih atanga an hmuh danin central obesity- waist-to-hip ratio sang lutuk (mawngtam lian lutuk tihna a ni deuh ber, kawngfek lai leh mawngtam inlenhleihna sang lutuk) ah chuan hnute cancer risk a sang a, hmeichhia an mawngtam tehkual a 80cm aia lianah chuan hnute cancer risk hi mawngtam te zawk te aiin a let thum ngawtin a sang zawk.

Tata Memorial Hospital-a department of epidemiology-a an hotu leh he zirchiannaa an hotu ni bawk Dr Rajesh Dikshit chuan, “Hnute cancer hi chi hrang hrang a awm a, thenkhat chu hormone oestrogen vang te a ni a, a then chu hmeichhe thihul hnu chauha awm te a ni. Hetiang risk neiin kum upat deuh hnua fa a neihin a risk chu a sang lehzual thei bawk a, tichuan an chenna hmun a zirte pawh a ni leh zel thei a, a chhan chi hrang hrang a tam khawp mai. Engpawh nise kan zirchianna hi chuan central obesity hian hnute cancer chi hrang hrang risk hi a tisang tih a entir a, thihul hma a ni emaw, thihul hnu emaw a danglam lo,” a ti.

He zirchianna atang hian body mass index (BMI) pawh Indian hmeichhia te zingah hnute cancer risk indicator tha tak niin an sawi a, Dr Dikshit chuan, “BMI inangah pawh Indian-te hi Caucasians (European, mingo ho) aia rit zawk kan ni tlangpui a. Chuvangin hmeichhia BMI normal mah se waist-to-hip ratio sang si te chuan hnute cancer risk hi an nei sang zawk a ni,” a ti bawk.

Khawpuia cheng kan tam telh telh a, hei hian hnute cancer risk a tisang niin an sawi bawk. Dr Dikshit chuan, “India-ah chuan thingtlang aiin khawpui hmeichhiaah hnute cancer a tam zawk a ni,” a ti.

Hnute cancer surgeon Dr Vinay Deshmane chuan Indian Cancer Society cancer registry atanga a landanin Mumbai-a hmeichhe 26 zinga pakhat zelin an damchhung, kum 75 an tlin hmain hnute cancer neih theihna risk an nei tih a entir niin a sawi a, “Obesity (thau lutuk) hian hnute cancer risk a tisang tih a chianna a tam tawh a, mahse, obesity leh hnute cancer inzawm dan tak hi chu hriat a la ni lo, rindanah chuan obesity hian oestrogenic influence a tisang a ni ang, tih a ni,” a ti.

He zirchianna chungchang hi European Journal of Cancer-ah tihchhuah a ni.

(THE AIZAWL POST – Phuah Pawlh)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy