Hmeichhe tana ‘texting mistake’

Hmeichhe tana ‘texting mistake’
Hmeichhia ten mipa kan text danah tihsual kan nei zeuh thin a, chu chu a pawi thei hle a, kan inlaichinna tichhetu a ni thei a, kan inkara inlaichinna kan siam tur tibahlahtu a ni thei bawk. Tunlaiah love letter tih vel kan inthawn ngai tawh lo a, ‘texting’ hi kan leklam ber a ni tawh miau si a, hman thiam a pawimawh hle a ni.
I mipa duhzawng tak mai i hmu fuh a, in inkawm a, hun hlimawm tak in hmang dun a, nuam a tih thu te pawh a hrilh ve luam che a. Mahse, khatia a tih mai vang khan text thlum tak takin umzui nghal chung chuang suh. A tlansan daih palh ang che. Tun tumah hian relationship lama mithiam ten hmeichhe ten mipa an text dana hriattur pawimawh ni a an sawi te kan rawn tarlang e.
1. Over-texting hi a awm thei tlat. Zingkarah in good morning-na message pahnih khat bakah chhunah a dang pahnih khat te chu a tha tawk viau. Mahse, a dozen tak meuh meuh message a um reng chu a tihchi lo khawp ang. A bik takin, “Tinge min lo call loh?” “Ka sam thar neih pawh i hre na nge?”, “Min ngai ve lo a nih kha!”, “I va induh ve!” tih vel ang chi te hi chu text loh a tha zawk. In inhre ve tan deuh chauh a ni a, “Miss-Over texter” a tih palh che chuan a pawi viau ang.
2. |awngkam khat lek lek a chhan chin loh tur. Text tluk tluk loh tur kan tih rual hian a rawn text ve che a, chhan ngai chi a nihin tawngkam bung leh tawi lutuk a chhan loh tur a ni a, tawngkam khat lek ang chi a chhan loh a tha bawk. Engtir nan, “Vawiin i hah em?” ti a a zawhna te kha, “Hah/hah lo,” tia chhan mawl tawp loh tur. Hetiang tawngkam khat leka inchhan hi a lo dawngsawngtu tan ngeiam lamah a kal duh tlat. Chuvangin friendly takin lo chhan la, mahse, sei leh lutuka chhan pawh a tul chuang lo, zing thawh hlim atanga ei rawngbawla i buai dan leh i hna lamah i buaina zawng zawng te a chipchiar thei ang bera hrilh kher erawh ninawm lam a ni leh si ang. Chuvangin chhan tan tawk, tawi fel, bung nghut ni si lo, a dawngtu tana chhiar nuam tur thlang thiam ang che.
3. Oversharing pawh hi thil awm thei a ni. Nakinah chuan i chanchin te pawh i la hrilh vek ang, mahse, tunah chuan intawng tir chauh in ni a, a la hun lo deuh. I zinnaa thlalak zawng zawng, in chhungkaw chaw eikhawm thlalak tih vel te kha thawn chiam chiam a tul rih lo. I thlalak nalh deuh pahnih khat thawn zauh te chu a pawi lo ang, mahse, chhungkaw thlalak leh in ran vulh tih vel zawng zawng nen chuan a tul rih lo e aw.
4. Text sei lutuk pawh thawn loh a tha zawk. Khawi laia thawnthu tawi emaw tih mai tur khawpa text sei te kha thawn fo ching suh, i text a nih vanga engkim chhiar châk em em turah ngai lo la, chhiar mumal mang loa a delete leh mai mai tur i text teuh palh ang e.
5. In-text pawh hi a hlimawm zawnga kalpui theih a ni. Inbiakna a ni a, thusawina a ni lo tih hre phawt mai la. Inbiakna a nih chuan mi pahnihin thil an sawi dun thin. Pakhat zawkin a sawi char char ringawt chuan a dik thei lo. Chuvangin sawi duh i ngah hle a nih pawhin, a text vena hun che siam thiam la, pakhat zawkin duh duh sawi char char mai bik lovin pahniha hlim taka inbiak zawk tur a ni.
6. In-text-na tawngkam pawh a ngai reng hman loh theih a tha khawp mai. Tuktin maia in good morning-na text thu ngai hlir dawn kha ngaiah a nei ve thei tlat. Zing, chhun, tlai leh zana i text dan tur zawng zawng te a lo hriat lawk vek chuan a tihchi loh. Chuvangin i good morning-na thu te pawh khan thlak ve zeuh zeuh la, i text dan tur a rin lawk theih loh turin i tih thin dan te thlak ve fo la a tha viau ang.