Daily Newspaper

Hmeichhe thil tithei ber- Angela Merkel

9

Germany Chancellor Angela Merkel chu Forbes-in khawvela hmeichhe thil tithei (powerful) zual mi 100 an thlan chhuah zingah pakhatna a ni.

Forbes-in ‘World’s 100 Most Powerful Women’ list hi tum 17 an tihchhuahna a ni tawh a, kumin list-ah hian ram hrang hrang 30 atangin an lang a, ram hruaitu lu 10 an tel a, CEO 38 leh entertainer panga an lang bawk. An kum bi pawh inthlau tak tak an ni a, hnathawh pawh inang lo tak tak an ni hlawm.

Merkel hi 2005 atang khan Germany Chancellor niin, tunah hian a term li-na a hmang mek a, Germany-a hmeichhe chancellor hmasa ber a ni. Merkel hian November 2018 khan Christian Democratic Union hruaitu a nihna atangin a chawlh thu a puang a, 2021-a a term a tawp hnuah chuan term dang atana chancellor nih leh tumna a nei tawh lo tih a lo puang tawh nghe nghe a ni.

Merkel hruaina hnuaiah Germany-in hma a sawn nasa hle a,sum leh pai lama harsatna an thawh lai atanga an ram khaichhuaktu pawimawh taka ngaih a ni. Merkel hi hmeichhe huaisen ti a sawi thin a ni a, Donald Trump pawh dodalin Syrian refugee maktaduai tel Germany-a awm tir ngattu kha a ni.

October 2020-a survey an neihah chuan European ram 14 zinga puilting chin 75% chuan Merkel hi Europe ram hrang hrang hruaitu zinga an rin ber niin an tarlang.

Angela Merkel chanchin a hriatlar vak loh chu, Physical Chemistry-a PhD a ni a, Academy of Sciences, Berlin-Adlershof chhuak niin, a thesis chu quantum chemistry a ni.

Forbes-in 2020 Khawvela hmeichhe thiltithei zual an thlan chhuah zinga Top 10-te chu:
1 Angela Merkel
2 Christine Lagarde
3 Kamala Harris
4 Ursula von der Leyen
5 Melinda Gates
6 Mary Barra
7 Nancy Pelosi
8 Ana Patricia Botín
9 Abigail Johnson
10 Gail Boudreaux


Hmeichhe thil tithei zingah Beyonce, Taylor Swift leh Rihanna an lang

Forbes-in khawvela hmeichhe thil tithei zual 100 an thlan chhuah zingah Beyonce, Taylor Swift leh Rihanna te an tel a, anni pathum hi he list-a zaithiam lar lang thei awm chhun an ni.

Zaithiam lar zingah Rihanna a thleng sang ber a, No.69 a ni. Rihanna hi charity lamah a inhmang nasa a, coronavirus relief atan pawh dollar maktaduai 8 chuang a thawh niin an tarlang.

Beyonce chu No.72 niin, ani hi On The Run II stadium tour a pasal Jay-Z nena an neih chu an hlawhtling hle a, a Homecoming Netflic special bakah Lion King an siamthar leh te keh Adidas nena an thawh dunna te pawh a hlawhtling hle a ni.

Taylor Swift chu No.82 niin, ani hi a larna te politics lamah hmang tangkai niin an tarlang a, a hla ‘You Need to Calm Down’ hmanga a fan-te pawh Equality Act support tura fuihtu a ni.

Entertainer zingah talk show host thin Oprah Winfrey chu a thleng san ber niin, No.20-ah a lang a, ani hi entertainer zingah top 50-a lang thei awm chhun a ni.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy