Abu Dhabi a hmeichhe naupang kum 5 mi, Alfai Al Marzooqi chuan a lehkhabu ziah ‘The Lost Rabbit’ a tlangzarh a, khawvela hmeichhe zinga lehkhabu tlangzarh thei naupang ber record a siam a, a pianna damdawiin Burjeel Hospital, Abu Dhabi-ah Guinness World Record certificate hlan a ni.
He hmeichhe naupang hian a lehkhabu ‘The Lost Rabbit’-ah hian amah leh a thiannu, Salma bakah sazupui bo ta, Fufu a tih te chanchin a tarlang a, nungchate chunga ngilneihna leh in hmangaih leh inngaihsak tawn a pawimawhna te a tarlang a ni.
He lehkhabu hi a thawnthu mil tur milem nena dah a ni a, a thawnthu mai bakah a milem te pawh Alfai ziah vek a ni. Alfai hi Teeb Al Barri chuan an fanu hian naupang kum 2 mi lek a nih lai atangin thawnthu sawi a thiam tawh niin a sawi a, hei bakah hian a fanu chu thawnthu a hrilh leh thawnthu a chhiar sak reng rengin zawhna tam tak a nei thin niin a sawi a, naupang dang aiin TV leh smartphone lam a buaipui ve lo ni a sawiin, “Lehkhabu a ngaina ber,” a ti.
Teeb chuan Alfai hian a lehkhabu ziah hi ni thum chhung a zo hman niin a sawi a, thawnthu a phuah mai bakah a milem thlengin a ziak zo vek hman a ni. Tunah chuan Alfai hian pawl khat (first grade) a zir mek a ni.
Hetiang thila Guinness World Record siam tur chuan lehkhabu ziah mai a tawk lo a, an lehkhabu ziah chu mipui lei theih tura tlangzarh ngei tur a ni a, chutah pawh bu 1,000 tal an hralh tlin ngei a ngai bawk a ni.
Hmeichhe zinga lehkhabu ziaktu naupang ber
