Hmeichhia inhmangaih tir i duh em?

Hmeichhia inhmangaih tir i duh em?
I kawppui khan hmangaih lehzual che se i ti em? Relationship lama mithiam ten hmeichhiain a hmangaih lehzual theihna tur che a tih tur a awm niin an sawi a, kan rawn tarlang e. Mipa tan hriat ngei chi a ni.
Nupa nunah emaw, inngaihzawnnaah emaw pawh ni se ngaia inneih a, thil reng reng a ni ve tur reng emaw tih mai a awl thin. Tun tumah hian mipain a tih tur leh a hriat atana pawimawh te kan rawn tarlang dawn a, i kawppuiin a hmangaih lehzual theih nan che i chhinchhiah vek dawn nia.
1. Mipain ruahmanna eng emaw a siam hian hmeichhiain nuam an ti. Eng emaw tih tur nei a, tih dan tur vel ruahmanna i siam lawk chuan hmeichhia i ti lawm ang. Khawiah emaw zin khawthawn a ni emaw, evening walk mai pawh ni se, “Tichuan ti ila,” tia ruahmanna i siam khan hmeichhe lawm zawng tak a ni a, i ngaihvenin i ngaihsak a ni tih i lantirna a ni.
2. Hmeichhe thusawi te uluk taka ngaihthlak peih tur a ni. Hmeichhia chuan sawi tur an ngah a, a duh leh duh loh zawng a sawi te pawh uluk takin ngaihthlak sak la, ngaithla satliah mai lovin hriat sak ang che. Hmeichhia chuan a thusawi te dawhthei taka ngaithla peih mipa bula awm nuam a ti thin. A pangpar ngainat zawng, a lehkhabu chhiar duh zawng, a chocolate tui tih zawng, a thiante chanchin tih vel thlengin a titi te ngaithla peih thin ang che.
3. Mipain a rilru hrehawmna leh a harsatna te a hrilh ve thin hian hmeichhiain nuam an ti. I ‘feelings’-te kha hrilh ve thin rawh. Chutiang chu i tih theih phawt chuan hmeichhia chuan i tan a pawimawh a ni tih a inhre dawn a, chu chu a tan a hlu hle a ni. I hlimna leh lawmna bakah i hrehawmna leh lungngaihna te i hrilh thin hmeichhia nih kha nuam a ti. Chutih rualin tih lutuk erawh a awm tih hriat a tha.
4. I nupui chu bedroom-ah tihlim rawh. Mahni nawmna chauh ngaihtuah tur a ni lo. Mipain bedroom-ah a kawppui a tihlawm theih chuan hmeichhia chuan a ngaiin a thlahlel lehzual ang. Bedroom-ah i tihhlim thiam zawh poh leh nang pawhin nuam i ti ang. Hmeichhiain bedroom-a a duhzawng te, a nuam tih zawng te hriatthiam sak tum tur a ni a, chu chu hriatthiam harsa a ni lo.
5. Hmeichhia chu a eitur te siamsak ve fo rawh. Choka chet zei tak mipa hi hmeichhia ten an ngaina duh riau a, chutah eirawngbawl thiam tak phei chu bonus point a ni.
6. Hmeichhia chu bazar-ah kalpui thin rawh. Inrinni tuk bazar-ah te amah maia kal tir lovin kalpui thin rawh. Chu chu mipa tan tlawmah lak tur a ni lo. Bazar hi hmeichhia ten nuam an ti tlangpui a, chutah a thil lei turin nalh i tih leh tih loh te i ngaihdan i lo thawh ve khan a tan a nuam lehzual.
7. I tih hreh zawng tak, mahse, ti tura a ngen che avanga tih i nei tawh em? Kha kha hmeichhe lawm zawng tak a ni. Mipain a tih hreh leh chak loh zawng tak hmeichhiain a ngen avanga a tih hian hmeichhia chuan pawimawh leh hlu riaua inhriatna a neih phah thin a ni.
8. Hmeichhia chu kuahin fawp fo rawh. Inngaihzawn laia chance neih hleka inkuah dan ringawt ngaihtuah thin kha inneih hnuah chutiang chu kan thlathlam leh si thin. A inrin loh lai tak ten kuah la, fawp zeuh thin te. A beisei loh lai tak ten han che zauh thin la, chu chuan a tihlim hle ang. Chuks zeuh tur khan a chhan eng emaw a awm kher a tul lo.
9. A chhungte hmangaih pui rawh. Hmeichhiain a chhungte hmangaiha ngaihven puitu mipa chu a ngaina lehzual thin. Mipain hmeichhe chhungte a kawmnel a, inpawh taka an awm theih chuan mipa tan bonus point a ni.
10. Hmeichhia chu duat tur an ni a, kehthei dawm taka dawm tur an ni, chutih rualin a chang chuan han chet ‘pa’ ve deuh te pawhin a tiphur zawk thei tlat. A hun erawh hriatthiam a tha. Bedroom-ah pawh zai dawh taka chet hun leh indim vak loh hun te pawh thliar hran thiam chuan nupa nun tinuam lehzualtu a ni ang.