Site icon The Aizawl Post

Hmeichhia telnaah hmasawnna…

Pathianin Adama tanpuitu turin Evi a siam tih Kristiante innghahna Bible-ah a chuang a. Adama leh Evi atanga tun hun inkarah hian mihring nunphung hi a danglam nasa tawh hle a; hei hi a chhan chu mihring kan lo pun zel avangin eizawnna a lo danglam chho zel a, finna a lo pung zel a, eizawnna pawh a lo danglam zel a, chu chuan hnam tinte culture a rawn sawi thiat chho mek a ni ta ber.
Mizote pawh hi kan bulbal chhui theih hla ber atanga kan hmuh theih chu, chhungkua leh khawtlang inrelbawlna chu mipa lalna, tih hi a ni. Chhungkua inrelbawlnaah fel takin hmeichhia leh mipa tihtur thliar fel a ni a, portfolio an inchuh buai lova, an inpui em em bawk lo. Mipa tihtur hmeichhiain a ti ngai lo a; chutiang bawkin hmeichhe tihtur mipain an ti ngai bawk lo; chutiang ti an lo awm chuan ‘zahthlak’ lamah a kal tlat a, inentleuna hial a thleng thin.
Chutiang chu tun hnuah hi chuan a ‘thing’ tawh tlat. Hmeichhe thenkhat chu mipa aia thahrui leh finna ngah zawkte an lo ni a, tunhmaa kan pi leh pute hun laia chhungkaw nunphung, portfolio inthliar fel sa kan tih ang kha la chhawm zel ta ila, ‘tun dinhmun kan thlen phak loh dan tur leh van sanzia chu…’ kan tih mai a ngai ang.
Tun lai khawvel hi han thlir ila, hmeichhiate rah behna ram reng reng, ram nuam leh muanawm a awm mang lova, an ram hausain khawsak phungah changkang angin lang thin mah se, zalenna an nei pha ngai lo.
Mizoram dinhmun han thlir ila, a tlangpuiin khawpui lamah chuan chhungkaw eizawnnaah mipa aia hmeichhia chhuakvak zawk an tam tawh hle. Hei hi a langsar awl a, mipa aia hmeichhia chungnung zawk ta hle anga sawi duhte pawh an lo awm ta. Mipa/hmeichhia, gender thenhranna rilru pua thil hi kan kalpui chiam chiam chuan thil tha lo zawk pawh thleng thei a ni. Hmeichhe thenkhat chu chhungkaw eizawnnaah mipa aia thiamna lama dinhmun sang zawk emaw, themthiamna nei tha zawk emaw, hmangchang hre zawk emaw pawh a lo ni thei a; mipa hnaa ngaih pawh a lo thawk lawp lawp thei bawk. Hetiang thil hi a langsar duh a, chuvang chuan kan huapzau tir ta mai thin a; ‘mipa aiin hmeichhia an chuti khati zawk’ tia sawi a lo hlawh ta thin a ni.
A lehlamah chuan, zirna leh eizawnna leh thil dang dangah, mipate inthlahdah avangin hmeichhia an lo lang lo thei lo va, hei hi ram inrelbawlna thlenga thil pawi thlentu a nih theih avangin mipa chauh tang tura infuih bik lovin, kan zavaia kan tanrualna tur a ni tih hi kan varpawh a pawimawh awm e.
A khaikhawm nan chuan, hmeichhe telnaah hmasawnna tha a awm zel, tih hi.

Exit mobile version