Women & Child Development (WCD) hnuaia State Hub for Empowerment of Women leh Mizoram State Legal Services Authority (MSLSA) tangdun buatsaihin in chhung khura hmeichhiate chunga tharum thawhna venna dan, ‘Protection of Women from Domestic Violence Act 2005’ chungchang chu Zirtawpni khan zirho a ni.
Hmanpuitu Gauhati High Court judge, High Court Legal Services Committee chairman ni bawk Justice Nelson Sailo chuan India danpuiin hmeichhiate dikna leh chanvo ngaipawimawhin a humhalh tlat tih a sawi a. Hmeichhiate chunga hleilenna thleng thin chu a ngai thutak hle a, IPC thlaktu dan thar Bharatiya Nyaya Sanhita (BNS) ah pawh a ngaihpawimawh zia tarlan a ni tih a sawi.
Aizawl Judicial District-a District & Sessions judge Helen Dawngliani chuan mipa leh hmeichhiate inkara inthliarhranna awm nasatnaah hmeichhiate tih duhdahna a thlen thin, tiin, mipa leh hmeichhiate inthliarhranna awmlo tura tanrual a tul tih a sawi a ni.
Gauhati High Court Aizawl Bench registrar Dr HTC Lalrinchhana chuan Protection of Women from Domestic Violence Act 2005 chungchanga hriat tur pawimawh leh a kaihhnawih mawhphurhna a zirtir a. Addl. District & Sessions judge Aizawl Sylvie Zomuanpuii Ralte chuan inchhung khura hmeichhiate chunga hleilenna thleng avanga court-in thubuai a chinfel tawh chhinchhiah tlakte sawiin, hetiang thubuai a thlen thulha chetlak dan tur leh hma lak zel dan turte a sawi a. Zawhna awmte chhan a ni.
Hmeichhiate humhimna dan zirtir
