Nitin serthlum tui (orange juice) no khat in thei la, i vun, sam leh tin te a lo nalh phah ngei dawn niin mithiam ten an sawi.
Orange juice-ah chuan vitamin C, potassium leh folic acid te a tam hle a, vitamin C chu collagen siamtu pawimawh tak a ni a, chubakah nutrient thami an tih mai Lutein te pawh a pai a ni.
Serthlum rawng ti engtu hi Ni zung vanga vun chhe tur vengtu leh siamtha tu a nih bakah vun fân theihna (elasticity) siamthatu niin an sawi.
Serthlum tui 200ml-ah hian 60mg vitamin C vel awm anga chhut a ni a, chu chu nitina puitlingin vitamin C a mamawh ang vel chiah a ni.
Nutrition lama mithiam Amanda Ursell chuan, “Kan thil eiin kan hmel a siam a tih chu kan hre deuh theuh ang, mahse, kan thil ei te chu engtianga tha nge, kan vun, sam leh tin tan engtianga tha nge tih erawh kan hre tam lo a ni. Tunah chuan beauty expert ten serthlum tui no khat thatna hi an hrechiang tawh a ni,” a ti.
Serthlum tui thatna chungchang hi CEW (Cosmetic Executive Women) a member ni lai mi 200, hmel tihthatna (beauty product) siamna lama inhmang ten an neih a ni a, chung zinga hmun thuma thena hmun hnih chuan an enkawl thin te tan nitin serthlum tui no khat in turin an rawn thin niin an sawi.
CEW UK-a board director Susan Mahy chuan, “Vun, sam leh tin hrisel nana kan mamawh te chu a damdawi leh hnawih chi aiin kan nitin thil eia kan telh hian a tha ber a ni,” a ti.
Hmelthat nan serthlum tui
