Nilaini khan deputy chief minister Tawnluia’n Edenther leh Tuivamit tea Aizawl Smart City Project hnuaia khelmual sak tur lungphum a phum.
Edenthar Playground lungphum phumnaah deputy chief minister chuan playground tha tak neih kawngah sorkar chauh ni lo Edenthar mipui leh khawtlang hruaitute an tanrual thu a sawi a, bialtu MLA remhriatna leh inpekna fakawm a tih thu a sawi.
Playground chu Mizo thalai leh infiammite chawikangtu ni se a duh thu a sawi a, national leh international level-ah pawh Mizote hming chherchhuaktu a nih ngei theih nan tangkai taka hmang turin a fuih. Veng mipuite chu neitu thinlung pu a, a enkawlna kawngah theihtawp chhuah turin a chah.
Bialtu MLA C Lalmuanpuia pawhin thu a sawi a, nghakhlel taka an lo thlir thin playground lungphum phum a ni ta chu ropui a tih thu sawii, harsatna hrang hrang kara a hlawhtlin theihna tura theihtawp lo chhuah thintute lawmthu a hrilh.
Edenthar playground tur hi Aizawl Smart City Limited hnuaia sak a ni a, play area tur chu 90 m X 45 m niin Astro turf phah a ni ang. A Project cost tura ruahhman chu cheng vaibelchhe 8.18 a ni.
Tuivamit khelmual sakna tur lungphum phumnaah deputy chief minister chuan Aizawl Smart City Project hnuaiah hian project 40 vel a awm tih a sawi a, heng zinga 30 vel chu bultan tawh a nih thu, a la bang zawng pawh hi bultan thuai turin sorkarin theihtawp a chhuah tihte a sawi.
Aizawl Smart City project chu kum 2018 atanga tan nimahse COVID-19 hripui leng vangin hma rei tak kan la thei lo a, boruak a ziaawm veleh theihtawpa chakin tha kan thawh a ni, a ti.
Bialtu MLA Zothantluanga pawhin thu a sawi a, Tuivamit khelmual sak a nih theihna tura hma an lak dante sawilangin, sorkarin an duhna a tihhlawhtlinsak avangin lawmthu a sawi a, Aizawl tlak lam veng te tan hmasawnna pawimawh tak a ni dawn tih sawiin, khelmual puitling sak a nih theihna tura department ram sahthlak saktu P&E department leh AH&Vety department chungah lawmthu a sawi bawk a ni.
He project hi cheng nuai 697 senga sak tura ruahman a ni a, kumin October thlaa zawh hman tum a ni.
Hmun hnihah khelmual sak tur lungphum phum
