Hmun ualauah ualau takin No 4
Mizoramah No 4 (heroin) a hluar a, a kal mar hle niin a lang. Tunlaiin Aizawlah hmun lun laiah a sulhnu hmuh tur a awm thin a, a zawrh leh a ruih pawh ualau takin an ti niin a ngaih theih.
Nikum kum chawhnu lamah khan Aizawl hmun lun lai, Vanapa Hall bul vel leh hmun dang te a fai deuh kuar a, tun hnaiah heng hmunah hian ruihhlo hnuhma a langsar leh mek.
Vanapa Hall bul vel, a sir vel leh kawng hnuai lam pawhtu step velah tun hnaiah ruihhlo ti thin an awm leh a, chhun pachangah pawh inchiu lai hmuh tur a awm fo.
“Step velah an inchiu mawlh mawlh fo a, chutiang chu kan hmu fo a. A huhovin an inchiu thin a nih hmel. Muthlu lawp lawp te, meng hlei thei lo te pawh hmuh tur an awm thin,” tiin a bul hnaia hnathawk tlangval pakhat chuan a sawi.
“Vawi khat phei chu, mi pakhat hian bawlhhlawh awmna hmun velah syringe a lo zawng a, ka khawngaih zawk a,” a ti bawk.
Aizawl dai vel, World Bank kawng te, |huampui helipad leh Zuangtui inpawhna kawng vel leh hmun dangah pawh ruihhlo ti leh a zuar an fuankhawm a, ualau takin an zuarin an rui mai thin tih thu dawn a ni.
Excise & narcotics department lam pawhin ruihhlo hi a hluar mar pat rih nia a lan thu an sawi a, man tur a tam thu te, Aizawl chauh ni lovin hmun dangah pawh a hluar thu te an sawi.
“Aizawlah hian a tam reng a, tun hnaiah Serchhip, Siaha leh Thenzawl velah man tur a awm, a tam thar niin a lang,” excise & narcotics department hotu pakhat chuan a ti.
Tripura, Meghalaya leh Assam te pawh an mangan thu leh, tunlaiin khawvel hmun hrang hrangah heroin vanga an mangan thu te a sawi bawk.
Hmun ualauah ualau takin No 4
![](https://theaizawlpost.org/wp-content/uploads/tap_logo-min-large.jpg)