Mizoram hmunphiah hralh thin chuan tunlai hian a rate chhiat lai ber a thleng mek a. Hmunphiah leikhawm thin thenkhat chuan an lei loh phah nia sawi a ni.
The Aizawl Post thudawn danin, Kolasib leh Mamit district hi a ram leilung leh sik leh sa avangin hmunphiahin a ngeih hle a, heng atanga hmunphiah tharchhuah hi a quality a tha in, India ram hmundang atang pawhin hmunphiah leikhawm turin kumtin hnamdang sumdawngten an rawn ngaihven thin.
Hei vang hian Kolasib district-ah chuan hmunphiah huan siama eizawng pawh chhungkaw tam tak an awm tawh a, a bikin Vairengte leh a chhehvelah chuan nitin hmunphiah an keh thar apiang a hringin hnamdang sumdawng hnenah an hralh thin. Hmunkhata leikhawm a, phoro hnua hralh leh an awm bawk.
Hmunphiah hi demand a awm leh awm lohah te, khaw that leh that lohah te a hralhna rate a innghat thui a, nitin a rate a danglam thin. Phai lama demand azirin a leitu an tam bakah a rate pawh kumtin a inanglo nasa thin hle tih sawi a ni.
A hralhna hnaivai a nih avangin Vairengte hi Mizorama hmunphiah hralh to berna a ni thin a, kuminah hian kumdang angin a leitu tur hnamdang sumdawngten an ngaihven loh avangin hmunphiah hralhna rate a sang hleithei lo nia sawi a ni.
“Nikum tun ang hunah khan hmunphiah hring kg khat Rs.50 te a nih laiin, tunlai hian kg khat Rs.25 a ni mek. Kumdanga kawngpui dung leh zau kawng peng tina hmunphiah lei tura indawh pawh kuminah hian hmuh tur an awm mang lo,” thudawnna chuan a ti.
Hetianga hmunphiah hralhna rate a chhiat avangin, kum hmasa lama leikhawm thin thenkhat chuan hmunphiah leikhawm hi an tih loh phah tih a sawi bawk.
Hetihlai hian hmunphiah huan siamtu leh a leikhawmtu thenkhat chuan kum hnih khat danah hmunphiah hralhna rate tha leh thalo hi a inchhawk thin tih an sawi a. Nikum lamah a rate a that avangin kumin hi a rate a chhiat an rinlawk thu sawiin, nakum lamah chuan hmunphiah rate pawh a that leh mai an beisei thu an sawi.
Vairengte leh a chhehvel khua leh Mamit district-a hmunphiah huan neituten harsatna an tawk a, chhim lamah Tlabung velah pawh harsatna an tawk mek.
Tlabung atanga thu dawn danin, kum dangah a hring kg-ah Rs.120, Rs.140, Rs.150 te a nih laiin, kuminah Rs 20-25 vel a ni a, a hunlaia an keh loh chuan a lak tlak loh mai dawn si a, Zodin Cooperative Farmers Society-in mazon-te biain kg-ah Rs.70 aia tlawma la lo turin an ngen a ni.
8 Vairengte-ah chuan nikum khan hmunphiah hring kg-ah Rs. 54-56 vel a ni a, kum hmasaah Rs.63 vel, kuminah chuan Rs 25-in an hralh.
8 Hmunphiah hi January thla tawp lamah an kek tan a, February thla chawhma lam hi a vanglai a ni thin. A par hmaa keh a ngai a, a chhiat hmaa hralh a ngaih bawk avangin a man tlawm mah se, an hralh lo thei lo.
8 Vairengte Aitlang vela hmunphiah hi Lailapur leh Bagha vela mazon-in an lei thin a, kumin hian hmunphiah hmun neitute hi a man a tlawm avanga an phur lo chungin a par hmaa keh a ngai si a, chu chu tlawm takin an hralh ta a ni.
8 February thla tir lam khan hmunphiah leitu pawl pakhat leh hmunphiah hmun neitute an inbia a, kg-ah Rs.34 tal nise, tia thu an dah hnuah Rs.36-in mazon-ten an la nghal a, mahse hei hian ni khat emaw chauh a daih tih sawi a ni.
Hmunphiah hralhna rate chhiatlai ber thleng mek
