Kuminah hmunphiah man a tlawm avangin a huan neite an mangang a, an manganna a zual zel tih an sawi.
Hmunphiah hi a lak leh a hralh hun a zo dawn hnai a, a tawp dawn aruaiah a man a tlawm zual ang tih an hlau. Hmunphiah thar hnem khua Vairengte-ah chuan Thawhtanni atang khan kg-ah Rs 15-in an hralh a, hei ai hian a tlawm leh ang tih an hlau.
A huan neite sawi danin, a sah leh a keh hnaah kg-ah Rs 12-in mi an ruai thin a, kuminah Rs 15 tein an ruai. Chuti a nih chuan a hring Rs 15-a an hralh hian hlawh an nei lo a, chu aia a tlawm phei chuan an hek dawn tihna a ni.
A tlawm avanga hmunphiah hi keh loh ngawt theih a ni lo a, “Hralhna tur a awm lo a nih pawhin keh tho a ngai. Sam a ngai a, chumi tur chuan a awm ang ang hi kan kek tho ang,” huan nei pakhat chuan a ti.
“A rate awm ang ang hi pawm lo thei kan ni lo a, chawi belh tur pawhin kan hna hi kan thawh a ngai,” huan neitu pakhat chuan a ti a, “Kumin chu kan mangang khawp mai, ei khawp kan thar lo a, hek zawk kan awm bawk a,” a ti bawk. “Rilru a hah tih piah lam a ni, kan ni tin khawsak a nghawng dawrh dawn a ni,” huan neitu dang pakhat pawhin a ti.
Hmunphiah lei tura Vairengte-a luh tum lo dang an awm tia chief minister-in a sawi chungchangah huan neitute chuan chutiang an hriat loh thu an sawi.
“Kan dang lo. Engah nge kan dan ang? An rawn lut lo ang tih kan hlau zawk alawm,” huan neitu pakhat chuan a ti a, “Rawn lut duh lo ta se a mangang tur chu keimahni kan ni,” a ti bawk.
Hmunphiah lei turin mazon rawn lut se an duh a ni mai lo a, a tam thei ang ber rawn lut se an duh tih an sawi a, mazon rawn lut an tamin an inlan a, hmunphiah man a to phah thin avangin mazon a tam thei ang ber rawn lut se an duh tih an sawi.
Hmunphiah huan neite mangang
