Kuminah hmunphiah a tlawm a, a hmun neitute an mangang hle. A tlawm hnuah pawh a man hi a la tla zel a, a tlawm telh telh mek. Vairengte velah February ni 17 khan hmunphian hring hi kg-ah Rs 13 man a ni a, a hmun neitute an mangang hle tih thu dawn a ni.
Vairengte leh a chhehvel khuate hmunphiah thar hi phiahpui a ni a, January thla laihawl atanga February thla laihawl thlengin a seng hun a ni. Kumin hian an nih tur ang an ni tawhah an ngai a, an hlawhtlinpui lo tih a chiang tawhah an ngai.
Kuminah a hring kg-ah Rs 30 vela an hralh lai kha a to ber lai a ni a, Rs 28-ah tla thlain, Rs 25-ah a tla leh. Chuta tangin Rs 18-ah a tla leh a, tun karah Rs 13-ah a tla leh.
Nikumah a man a tlawm avangin an buai tawh a, hmunphiah hmun neitute sawi danin, chumi hma chuan kg 1 hi Rs 40-in an tan thin. Chu chu a leitute’n an inlan a, a pung a, Rs 58 man te a ni thin.
A hmun neitute hian hmunphiah an kek a, hetah hian kg-ah Rs 15 vel an seng thin. Rs 15 vel an senna Rs 40 leh a chung lama an hralh hian a man an ti.
“Kan hlawhchham e, hei hi a chiang tawh. A vanglai a pel tawh a, tunah chuan a par tawh a, rah tawh te pawh a awm. Hralh hun a ni lo tan a, a man a tlawm vangin kan thawhrah kan seng lo tih a chiang tawh e,” hmunphiah hmun neitu pakhat chuan a ti.
Hmunphiah hi an kek lo thei lo tih an sawi a, kum thar atana inhmakhua nan an keh tho a ngaih avangin man tlawm taka hralh tur pawhin an kek tho tih an sawi. Chutih rual chuan kek lo leh kek zo lo an awm tih an sawi bawk.
Hmunphiah man tlawm chhanah hian sorkar rate bituk an puh a, a ro kg-ah Rs 100 tia nikuma an bituk khan, hmunphiah leitute’n sorkarin a lei tak tak dawn lo tih an hria a, a hring man an chhiar tlawm ta tih chu an sawi dan a ni. Hmunphiah hring kg 3-ah a ro kg 1 a chhuak an ti a, sorkarin a ro kg-ah Rs 100 a tih hian a lei thintute’n anmahni lo chu a lei tur an awm chuang lo tih hriain an ngam tlawm ta a ni an ti.
Hmunphiah man tlahniam zel
