Kuminah hmunphiah man a tlawm a, tun hnaiah a tlawm lehzual. A hmun neite an mangang hle.
MPCC elected OB tur thlannaah thlur hnihinHmunphiah thar tamna Vairengte-ah kumin hian hmunphiah hi mazon-in kg-ah Rs 25-in a hring an lei a, a tlawm em avangin a hmun neite an mangang hle. Rs 25 pawh tlem an tih tawh laiin a tlahniam leh a, February ni 19, Thawhtanni atang khan Rs 15-ah a tla!
“A mak khawp mai! Vaiho hian an duh dan danin min sawisa a ni ber e,” hmunphiah thartu pakhat chuan a ti.
“Hralh lo thei lo dinhmunah kan ding tih an hria a, an duh dan danin a rate an chhiar a, keini lah iai thei dinhmunah kan ding si lo,” a ti bawk.
Hetia Rs 15-a a tla hi a chhan an hre lo a, Rs 15 hi pawm theih chi-ah an ngai lo. Mahse lo phal lo se an dah chhe dawn tihna a ni mai a, chuvangin hreh tak chungin Rs 15 chuan an hralh leh ta a ni.
Hmunphiah hi a sat tur leh a kek turin a hmun neite hian mi dang an chhawr thin a, a sah leh a keh hi hna khatah neiin, kg khat-ah Rs 12-in mi an ruai thin. Hei hi kuminah a pung tih an sawi a, kg-ah Rs 14 leh Rs 15-in mi an ruai tih an sawi. Chuvangin, kg-a Rs 25-a hralh hi, an senso nen inphu lo an ti a, Rs 15-a hralh phei chu pawm theih chi-ah an ngai lo.
“Theih se chu kg 1 Rs 25-a hralh hi kan phal lo ang. Mahse leitir duh lo ngawt ila a tuartu tur chu keimahni tho kan ni,” hmunphiah hmun neitu pakhat chuan a ti.
Hmunphiah man hi kumin hian a tlahniam nasa hle; 2022-ah khan a hring hi kg-ah Rs 63 te a kai a, a hniam lai pawhin Rs 30-40 te a ni. Nikum khan kg-ah Rs 54-56 tein an hralh a, Rs 40-50 te a nih lai pawh a awm.
Kuminah a man a tlawm avangin hmunphiah huan neite hian an hlawh tlem dawn tih an sawi a, a huan nei pakhat chuan, “Kumina cheng nuai hlawh pha kan awm kher lo ang. Cheng nuai hlawh tling tur chuan vanneih tel a ngai ang,” a ti.
Hmunphiah man tlawm lehzual
